لەدوای ئەوەی زۆرینەی فراکسیۆنەکان و پەرلەمانتاران بڕیاریاندا سبەی بەشداری کۆبوونەوەی ئەنجومەنی نوێنەرانی عێراق نەکەن پارتی – یش بەناچاری بڕیاریدا سبەی بەشداری دانیشتنەکە نەکات.
پەرلەمانی عێراق کارنامەی دانیشتنی سبەینێی ئاشکراکرد و ڕایگەیاند، سبەی دووشەممە، کاتژمێر 12ی نیوەڕۆ، دانیشتنی پەرلەمان دەستپێدەکات بۆ دوو بڕگە.
ئەمڕۆ دادگای فیدراڵی بڕیاریدا ڕێكارەكانی كاندیدبوونی هۆشیار زێباری بۆ سەرۆكایەتیی كۆمار ڕابگرێت.
بەپێی دەقی بڕیارەكەی دادگای باڵای فیدراڵی، لەسەر ئەو سكاڵایەی كە دژی كاندیدكردنی هۆشیار زێباری كراوە، بڕیاردرا بە ڕاگرتنی ڕێوشوێنەكانی ئەنجومەنی نوێنەران سەبارەت بە قبوڵكردنی (هۆشیار مەحمود محەمەد) وەك كاندیدی پۆستی سەرۆك كۆمار.
هۆكاری ڕاگرتنی كاندیدبوونی زێباری بۆ پۆستی سەرۆك كۆمار، ئەوەیە كە “قبوڵكردنی كاندیدكردنی ناوبراو بۆ پۆستی سەرۆك كۆمار لەلایەن ئەنجومەنی نوێنەرانەوە، پێچەوانەی حوكمەكانی دەستوورە و پێشێلكارییەكی گەورەی ئەو دەقانەیە كە لە دەستووردا هاتوون، چونكە ناوبراو مەرجەكانی ماددەی (68/سێیەم)ی دەستووری عێراقی ساڵی 2005ی تیادا نین”، وەك دادگای باڵای فیدراڵی دەڵێت.
