دوای سێ ساڵ لە کوژرانی ئەبوبەکر بەغدادی، ئەمیری ڕێکخراوی داعش لە نزیک ئیدلب، ئەمڕۆ جێگرەوەکەی بەناوی “ئەبو ئیبراهیم هاشمی ئەلقوڕەیشی” لە نزیک هەمان شوێن کوژرا، هەردوو ڕووداوەکەش لە سنووری هێزەکانی تورکیا و گروپە چەكدارە هاوپەیمانەكانیدا بوون.
لەدوای دەستوەردانی سوپای تورکیا لە سوریا، پارێزگای ئیدلب لەژێر دەسەڵاتی سوپای تورکیادایە و تا ئێستاش گروپە چەکدارییە هاوپەیمانەكانی ئەنقەرە، لەژێر کاریگەریی تورکیادا ڕەفتار دەكەن، هێرش دەكەن، یان ئاگربەست ڕادەگەیەنن.
سەرەڕای ئەوەی بەشێک لە وڵاتانی جیهان باس لە هاوکاریی تورکیا دەکەن بۆ داعش، بەڵام ئەمە لە ئاستی فەرمیدا نییە و تەنها ئیدارەی خۆسەر لە ڕۆژئاوای کوردستان بەبێ پەردە بەڵگەکانی هاوکاریی تورکیا بۆ داعش دەخاتە ڕوو، بە هێرش و هەوڵی ئەمدواییەی حەسەكەشەوە بۆ هەڵاتنی زیندانییانی داعش.
لە سەردەمی ئیدارەی دۆناڵد ترەمپدا، ساڵی 2019 ئەبوبەکر بەغدادی لە سنووری ناوچە داگیركراوەكان لەلایەن توركیاوە کوژرا، ئەمڕۆش جۆ بایدن، سەرۆكی ئەمریكا ئاشكرایكرد، هێزەكانی وڵاتەكەی، لە ئۆپەراسیۆنەكەی ئەمڕۆی باكووری سوریا، ئەبو ئیبراهیم هاشمی ئەلقوڕەیشی-یان كوشتووە، كە دوای كوشتنی ئەبوبەكر بەغدادی، وەك ئەمیری داعش شوێنی گرتبووەوە.
كۆشكی سپیی ئەمریكا ڕاگەیەندراوێكی بایدنی بڵاوكردەوە، تیایدا هاتووە، “بە فەرمانی من، هێزە سەربازییەكانی ئەمریكا لە باكوری و خۆرئاوای سوریا ئۆپەراسیۆنێكی ڕووبەڕووبوونەوەی تیرۆریان بە سەركەوتوویی ئەنجامدا، ئەوەش بۆ پاراستنی گەلی ئەمریكا و هاوپەیمانەكانمان و كردنی جیهان بە شوێنێكی ئارامتر”.
بایدن ئاشكرایكردووە، “بەهۆی توانا و ئازایەتیی هێزە چەكدارەكانمان، ئەبو ئیبراهیم هاشمی ئەلقوڕەیشی، سەركردەی داعش لە مەیدانی جەنگ سڕایەوە”، واتا لە ئۆپەراسیۆنەكەی ئەمریكادا جێگرەوەكەی ئەبوبەكر بەغدادی كوژراوە.
لە ئۆپەراسیۆنەكەدا هیچ سەربازێكی ئەمریكی زیانی بەرنەكەوتووە، وەك ئەوەی سەرۆكی ئەمریكا باسیكردووە.
