شانەی ڕاگەیاندنی ئەمنیی عێراق سەرکۆنەی بۆردوومانەکانی شەوی ڕابردووی تورکیای بۆسەر شەنگال و مەخمور کرد، داوای ڕاگرتنی سنووربەزاندانەکان و ڕێزگرتنی ڕێککەوتنە نێودەڵەتییەکان دەکات.
لە ڕاگەیەندراوێکدا شانەی ئەمنیی عێراق ئاشکرایکردووە، سەرکۆنەی ئەو پێشێلکارییانەی تورکیا دەکەن کە شەوی ڕابردوو تورکیا لە هەرێمی کوردستان و بەدیاریکراوی لە (شەنگال و مەخمور) ئەنجامیداوە.
شانەكە دەڵێت، “ئێمە لەکاتێکدا سەرکۆنەی ئەو کارانە دەکەین، هێزەکانمان هەر پێشێلکارییەک لەهەر لایەنێکەوە بێت ڕەتدەکەنەوە”، داواش لە تورکیا دەکات پابەندبێت بە پاراستنی دراوسێیەتی بەپێی ڕێککەوتنە نێودەوڵەتییەکان.
هەروەها داوای ڕاگرتنی سنووربەزاندنەکان، ڕێزگرتن و پابەندبوون بە بەرژەوەندییە هاوبەشەکانی هەردوو وڵات دەکات و داوای دووبارەنەکردنەوەی ئەو کردەوانە دەکات، ”عێراق ئامادەیە بۆ هاوکاریی نێوان هەردوو وڵات لەسەر پرسە ئەمنییەکان لە سنوورە هاوبەشەکاندا”.
شەوی ڕابردوو فڕۆکە جەنگییەکانی تورکیا كامپی ڕوستەم جودی-یان لە مەخمور و هەروەها شەنگالیان بۆردومانکرد.
