وەزارەتی بەرگریی ئیمارات ڕایگەیاند، ڕێگرییان کردووە لە مووشەکێکی بالیستی ئاراستەكراو لەلایەن حوسییەکانەوە و هیچ زیانێکی نەبووە.
لە ڕاگەیەندراوێكدا وەزارەتی بەرگریی ئیمارات دەڵێت، “بەیانی ئەمڕۆ ڕێگریمانکردووە لە مووشەکێکی بالیستیی حوسییەکان و تەقێندراوەتەوە، لەگەڵ ئەوە پارچەکانی مووشەکەکە لە ناوچەیەکی نیشتەجێبوون کەوتوونەتەخوارەوە، بەڵام هیچ زیانێکی گیانییان نەبووە”.
بەپێی بەیاننامەکەی وەزارەتی بەرگریی ئیمارات، دوای ئەو هەوڵە ئیمارات و حکومەتی یەمەن سەکۆی مووشەکەکەیان دۆزیووەتەوە و تێكیانشكاندووە.
بەرگریی ئیمارات جەختیکردووەتەوە، ئەوان پێشتر ئامادەی ئەو هێرشە بوون و ئامادەکارییان کردووە.
دوای هێرشەکە ئیدارەی گشتی هێڵە ئاسمانییەکانی ئیمارات ڕایگەیاند، هەموو گەشتە ئاسمانییەکان ئاسایین و لە شوێن و کاتی خۆیاندا ئەنجامدراون و دەدرێن، ئەو هێرشە کاریگەریی لەسەر گەشتەکان نەبووە.
