ناڕەزایەتییەکانی عێراقییەکان دژی کاندیدکردنی هۆشیار زێباری بۆ پۆستی سەرۆک کۆمار تا دێت فراوانتردەبن و ئەمڕۆ لە بەغداد خۆپیشاندان دەستیپێکرد.
دوای ئەوەی لە چەند ڕۆژی ڕابردوودا شەپۆلێکی بەرفراوانی ناڕەزایی عێراقییەکان دژی کاندیدکردنی هۆشیار زێباری بۆ پۆستی سەرۆک کۆمار سەریهەڵدا، ئەمڕۆ ناڕەزایەتییەکان گەیشتنە ڕادەی خۆپیشاندان.
سەرەتا ناڕەزایەتییەکان لەڕێگەی تۆڕە کۆمەڵایەتییەکان و بڵاوکردنەوەی هاشتاگ و هەڵواسینی لافیتە و پۆستەر لە شەقام و شوێنە گشتییەکانی بەغداد و چەند شوێنێکی تر دەستیانپێکرد.
ئەمڕۆ هەینی لە گۆڕەپانی تەحریری ناوجەرگەی بەغداد کە شوێنی ناڕەزایی دەربڕینی خۆپیشاندەرە تشرینییەکانە دژی گەندەڵی، خۆپیشاندان دژی کاندیدکردنی هۆشیار زێباری بۆ پۆستی سەرۆک کۆمار دەستیپێکرد و خۆپیشاندەران لە دروشمەکانیاندا ئاماژە بۆ ئەوە دەکەن، قایلنابن کەسێک کە بەهۆی گەندەڵییەوە متمانەی لێسەندرابێتەوە، کاندیدی پۆستی سەرۆکی وڵات بێت.
