سەرەڕای ئەوەی چەند ڕۆژێكە حكومەتی هەرێم بڕیاریداوە مووچەی تەواوی ئەو وەزارەت و توێژانە دابەشبكات كە مووچەی مانگی ڕابردوویان وەرنەگرتبوو، بەڵام پارە نییە بۆ دابەشكردنی مووچەی خانەنشینان.
دوای ئەوەی بەغداد 200 ملیار دینارەكەی بۆ هەرێمی كوردستان نارد، وەزارەتی دارایی خشتەی مووچەی بڵاوكردەوە و بڕیاردرا تا كۆتایی هەفتەی ڕابردوو تەواوی وەزارەت و توێژەكان، كە مووچەی كۆتا مانگی ساڵی ڕابردوویان وەرنەگرتبوو، مووچە وەربگرن.
بەڵام چەند ڕۆژێكە خانەنشینان دەچنە بانكەكان بۆ وەرگرتنی مووچەكانیان، كەچی پارەی پێویست لە بانكەكاندا نییە بۆ ئەوەی مووچەیان پێبدرێت.
نەبوونی پارە بۆ مووچەی مانگی ڕابردووی خانەنشینان لەكاتێكدایە، جوتیار عادل وتەبێژی حكومەتی هەرێمی كوردستان ڕایگەیاندبوو، لەكاتی خۆیدا مووچەی مانگی یەكی ئەمساڵ دابەشدەكرێت.
