وەزارەتی پێشمەرگەی حکومەتی هەرێم ڕایگەیاند، جیاوازیی مووچەی پێشمەرگە و پلەدارانی یەکەی 70 بەستراوە و هاوشێوەی یەکەی 80ی لێدەکرێت.
لە نووسراوێکدا وەزارەتی پێشمەرگە دەڵێت، “لەچوارچێوەی هەنگاوە بەردەوامەکانی پڕۆسەی چاکسازی و باشکردنی ژیان و گوزەرانی پێشمەرگە، دوای هەوڵە بەردەوامەکانی وەزیری پێشمەرگە بۆ ڕێکخستن و یەکسانکردنی تەواوی بودجە و مووچەی هێزەکانی پێشمەرگەی کوردستان، بەنووسراوی ژمارە 756 لە ڕۆژی 16ی کانوونی دووەم، بە واژووی (شۆڕش ئیسماعیل) وەزیری پێشمەرگه، کە بۆ یەکەی حەفتا نێردراوە، تیایدا ئاماژە كراوە، پاش ڕەزامەندیی وەزارەتی دارایی و ئابووری/ بەڕێوبەرایەتی ژمێرکاری، بڕیاردرا بە (خەرجکردن و بەستنی جیاوازیی مووچەی سەرجەم پێشمەرگە و پلەدارانی (یەکەی 70)، هاوشێوەی (یەکەی 80) لە مانگی 1ی ساڵی 2022وەوە.
بڕیاری هاوتاكردنەكە دوای ئەوە دێت، چەند ساڵێكە مووچەی یەكەی 70 لەگەڵ یەكەی 80 جیاوازن، ئەوەش ناڕەزایەتیی لێكەوتبووەوە.
