لە کەناراوەکانی ناوچەی کاراتاش سەربە پارێزگای ئەدەنە باشووری تورکیا، بەلەمێکی ڕاوکردن لەگەڵ کەشتییەکی نەوت ھەڵگریی یۆنانی بەریەککەوتن و لە ئاکامدا، پێنج ڕاوچیی تورکی خنكان كە تەرمی چواریان دۆزاوەتەوە.
بەپێی ڕاگەیەندراوێک کە لەلایەن فەرماندەیی ئاسایشی کەناردەریای تورکیا بڵاوکراوەتەوە، بەرەبەیانی ئەمڕۆ چوارشەممە 11ی تشرینی دووەم، بەلەمێکی ڕاوکردن لەگەڵ کەشتییەکی نەوت ھەڵگریی یۆنانی بە دووری 15 میل لە ناوچەی کاراتاش، بەریەککەوتوون کە بووەتە هۆی وەرگەڕانی بەلەمە توركییەكە.
ئاماژە بەوەشدراوە کە بەھۆی ڕوداوەکەوە، پێنج ڕاوچی تورک خنكان و بێسەروشوێن بوون، هەروەها تیمەکانی ئاسایشی کەناردەریا لە ھەوڵەکانیان بەردەوامن بە ئامانجی دۆزینەوەی بێسەروشوێنبووان.
بەڵام پاش چەند كاتژمێرێك، پارێزگاری ئەدەنە لە ڕاگەیەندراوێكدا ئاشكرایكرد، تەرمی چوار لەو ڕاوچییە توركانەیان دۆزیووەتەوە كە بەهۆی ڕوداوەكەوە بێسەروشوێن بوون و تا ئێستا تەرمی دانەیەكیان نەدۆزراوەتەوە.
