بەڕێوەبەرایەتیی گشتیی کەشناسی و بومەلەرزەزانیی هەرێمی کوردستان کەشوهەوای ئەمڕۆ و سبەینێی هەرێمی کوردستانی بڵاوکردەوە، بەپێی پێشبینییەکان سبەینێ لەهەندێک ناوچە نمەباران لەگەڵ بەفربارین دەستپێدەکات.
بەپێی پێشبینییەکانی کەشناسیی هەرێمی کوردستان، ئەمڕۆ ئاسمان ساماڵ و پەڵەهەور دەبێت، سبەینێش لەسنووری پارێزگای دهۆک و بەشێک لەناوچە شاخاوییەکان نمەباران بەتێکەڵی لەگەڵ بەفربارین دەستپێدەکات.
لە پارێزگاکانی هەولێر، سلێمانی، هەڵەبجە و کەرکوک سبەینێ ئاسمان پەڵەهەور و نیمچە هەور دەبێت.
ئاماژەبەوەشکراوە، سبەینێ بۆماوەی چەند کاتژمێرێک لەکاتەکانی ئێوارەدا کەشێکی ناجێگیری کورتخایەن ئەو ناوچانە دەگرێتەوە.
بەپێی پلە گەرمییە تۆمارکراوەکانی کەشناسی، نزمترین پلەی گەرمیی لەپێنجوێن بووە کە -25 پلەیە، لەماوەت -14، بازیان -12، سۆران -11 و لە بارزان -10 پلە تۆمارکراوە.
نزمترین پلەی گەرمای تۆمارکراو لە شاری هەولێر -2 پلە، سلێمانی -6 پلە، دهۆک -3، هەڵەبجە -6 و کەرکوک -1 پلە تۆمارکراون.
