نووسینگەی ڕاگەیاندنی پارێزگاری هەولێر ئاشکرایدەکات، سەرەڕای دەستبەکاربوونی تیمە حکومییەکان، بەڵام هێشتا هەندێک ڕێگا بەهۆی بوونی بەفرەوە مەترسیدارن بۆ بەکارهێنان.
پارێزگاری هەولێر لە هۆشدارینامەیەکدا ڕایگەیاندووە، “ئاگادارى سەرجەم هاوڵاتییان و شوفێرانی سنوورى پارێزگاکەمان دەکەینەوە بەهۆى ئەو شەپۆلە بەفرەى لە دوێنێ شەوەوە شار و شارۆچکە و گوند و ناوچەکانی سنوورى پارێزگاکەمانى گرتووەتەوە، ئەگەر کارێکی پێویستیان نەبێت هەندێک ڕێگا بەکارنەهێنن”.
ئاماژەی بەوەش کردووە،” سەربارى ئەوەى تیمەکانى حکومەت لە بەڕێوەبەرایەتیی چاككردنەوە و پاراستنی ڕێگاوبانی هەولێر و بەرگریى شارستانى و هاتوچۆى هەولێر و تیمە خزمەتگوزارییەکان بەردەوام لە کارکردندان بۆ ڕاماڵینى ڕێگاکان لە بەفر و پاراستنى سەلامەتیى گیانى هاوڵاتییان و شوفێران، بەفر ئاستەنگیی زۆری بۆ هاتوچۆ دروستکردووە و ڕێگاکان مەترسیدارن، بۆیە تکادەکەین ئەوەى کارى زۆر پێویست و بەپەلەى نەبێت ڕێگاکانى دەرەوەى شار بەکارنەهێنێت و لە ماڵەکانى خۆتاندا بمێننەوە، بۆ گەشت و سەیران و بەسەربردنى چەند کاتێکى خۆش خۆتان دووچارى کێشە و مەترسى نەکەن”.
لە دوێنێوە شەپۆلێکی بەفربارین و سەرما هەرێمی کوردستانی گرتووەتەوە و جیاواز لە شەپۆلەکانی دیکە، بەفر لە سەنتەری شاری هەولێر باری و لە سنووری پارێزگاکەش بەفر هەندێک ڕێگای داخستووە.
