ئێوارەی دوێنێ لە شاری کەرکوک لەلایەن کەسێکی نەناسراوەوە تەقە لە باوک و کوڕێک کرا، بەهۆیەوە باوکەکە کوژرا و کوڕەکەش بەبرینداری لە نەخۆشخانەیە.
پەیامنێری تۆڕی میدیایی ئێستا لە کەرکوک گواستییەوە، ڕووداوەکە لە گەڕەکی کوردستانی شاری کەرکوک ڕوویداوە، ئەوانەی تەقەیان لەو باوک و کوڕە کردووە کەسانی نەناسراو بوون.
ئەو کەسانەی تاوانەکەیان ئەنجامداوە، بە ئۆتۆمبێلێکی جۆری ئۆپڵی بێ ژمارە تەقەیان لەو کوڕ و باوکە کردووە و تا ئێستا دەستگیرنەکراون.
کوژراوەکە دوکاندارە و کاری فرۆشتنی کەرەستەی کارەبایی دەکات.
دوای ئەوەی تەقەیان لێکراوە باوکەکە بەسەختی برینداربووە و چوار گوللـەی بەرکەوتووە، دوای گەیاندنی بە نەخۆشخانە گیانیلەدەستداوە، بەڵام کوڕەکەی کە تەمەنی 16 ساڵە بریندارە.
تا ئێستا هۆکاری ڕووداوەکە نەزانراوە و پۆلیس لێکۆڵینەوەی لە ڕووداوەکە دەستپێکردووە.
