وتەبێژی دەوڵەتی یاسا ناوەڕۆكی كۆبوونەوەكەی بارزانی و عامری بۆ “ئێستا” ئاشكرادەكات

وتەبێژی دەوڵەتی یاسا بە سەرۆكایەتیی نوری مالكی كە پێكهێنەرێكی سەرەكیی چێوەی هەماهەنگیی شیعییەكانە، ناوەڕۆكی كۆبوونەوەكەی هادی عامری وەك نوێنەری چێوەی هەماهەنگی لەگەڵ بارزانی ئاشكرادەكات و دەڵێت، داوایان لێكردووە پشتیوانیی لایەنێكی شیعی نەكات دژ بە لایەنێكی تر. ئەو ڕەتیدەكاتەوە سەدر توانیبێتی ڕیزەكانیان پەرتبكات و دەڵێت، “یەكدەنگ و یەكگرتووین”.

لە چەند ڕۆژی ڕابردوودا هادی عامری سەرۆكی هاوپەیمانیی فەتح و یەكێك لە سەركردەكانی چێوەی هەماهەنگی، سەردانی پیرمام-ی كرد و لەگەڵ مەسعود بارزانی سەرۆكی پارتی دیموكراتی كوردستان-دا كۆبووەوە.

لە لێدوانێكدا بۆ تۆڕی میدیایی ئێستا، بەها نوری وتەبێژی دەوڵەتی یاسا ناوەڕۆكی كۆبوونەوەكەی ئاشكراكرد و ڕایگەیاند، هادی عامری سەرۆكی هاوپەیمانیی فەتح و یەكێك لە سەركردەكانی چێوەی هەماهەنگی، لە سەردانەكەیدا بۆ هەولێر و كۆبوونەوەی لەگەڵ مەسعود بارزانی سەرۆكی پارتی دیموكرات، داوایكردووە لایەنگیری نەكەن و پشتیوانیی لایەنێكی شیعی نەكەن دژ بە لایەنێكی تر.

ئاشكرایكرد، لە گفتوگۆ و دانوستاندنەكاندا داوایان لە لایەنە كوردستانییەكان كردووە بێلایەن بن و پشتیوانیی هیچ لایەنێكی شیعی نەكەن.

لەبارەی ئەوەی چەند ڕۆژێكە دەوترێت سەدر توانیویەتی ڕیزەكانی چێوەی هەماهەنگی پەرتبكات و هاوپەیمانیی فەتح بە سەرۆكایەتیی هادی عامری لە چێوە بهێنێتە دەرەوە و هەر ئەوەش وایكردووە سەدر و عامری دوو بە دوو كۆببنەوە، بەها نوری وتی، “عامری وەك نوێنەری چێوەی هەماهەنگی كۆبوونەوە و دانوستاندن لەگەڵ سەدر دەكات و بەهیچ شێوەیەك ڕیزەكانمان پەرتنەبوون”.

بەپێی وتەی ئەو، كۆبوونەوەیان لەگەڵ موقتەدا سەدر ڕێبەری ڕەوتی سەدر-دا، “مەبەست لێی لێكنزیككردنەوەی بۆچوونەكانە لەبارەی پرۆسەی سیاسی و پێكهێنانی حكومەت وتووێژ لەگەڵ سەدر بەردەوامە”.

جەختیشیكردەوە كە “چێوەی هەماهەنگی یەكدەنگ و یەكگرتووە، هەموو لایەنە پێكهێنەرەكانی هاوهەڵوێستن یان پێكەوە بەشداریی حكومەت دەكەن یاخود هیچ لایەنێكیان بەشداری ناكات”.

بابەتی پێشتر

کەشناسی: ئێستا بەرەی پێشەوەی ئەو نزمە پاڵەپەستۆیە گەیشت کە دەبێتە هۆی بەفربارینێکی زۆر

بابەتی دواتر

تاڵیبان داوا له‌ وڵاتانى ئیسلامى ده‌كات دان به‌ حكومه‌ته‌كه‌یدا بنێن

بابەتی پەیوەندیدار
زیاتر ببینە

هێرشكرایە سەر شەزا

شەزا حەسون، كچە گۆرانیبێژی عێراقی سەردانی شوێنی تەقینەوەكانی پێنجشەممەی ڕابردووی بەغداد-ی كرد و ئەوەش كاردانەوەی توندی خەڵكی لێكەوتەوە.…
Total
0
Share