فەرماندە ئەمنییەكانی عێراق فەرمانیان كردووە، هێزی ئەمنی و سەربازی لە ناوچەكانی نێوان پارێزگای دیالە و سەڵاحەدین بڵاوەپێبكەن، بە مەبەستی دۆزینەوەی ئەو كەسانەی موشەك ئاڕاستەی بنكەی ئاسمانیی بەلەد دەكەن.
ئەمڕۆ شەممە 24ی نیسان، سەرچاوەیەكی ئەمنی بە ئاژانسی نیشتمانیی عێراقی ڕاگەیاندووە، “بە فەرمانی فەرماندە ئەمنییەكان، هێزی ئەمنیی جێگیر و جوڵاو بە درێژایی ڕووباری دیجلە لە سنووری پارێزگای دیالە بڵاوەیان پێكراوە”.
ئەوەش خراوەتەڕوو، “ئەو ناوچەیە ژمارەیەكی زۆر گوندی لێیە كە هێزە چەكدارەكان بۆ تەقاندنی موشەك بە ئاڕاستەی بنكەی ئاسمانیی بەلەد لە پارێزگای سەڵاحەدین، بەكاری دەهێنن”.
لەلایەكی دیكەوە، لە بەری پارێزگای سەڵاحەدین لە لێواری ڕووباری دیجلە بە هەمان شێوە هێز بڵاوەی پێكراوە.
مەبەست لەو هەنگاوە، ڕێگریكردن لەو هێرشە موشەكییانەیە كە بەردەوام لەو ناوچانەدا ئەنجامدەدرێن.
