بەڕیوەبەرانی یانەی نیوکاسڵی ئینگلیزی لەگەڵ یانەی بەرشلۆنە لەسەرهێڵن، بۆ گواستنەوەی عوسمان دێمبیلی فەرەنسی.
بەپێی زانیارییەکانی “دیاریۆ سپۆرت”ی ئیسپانی، نوێنەری شێخ محەمەد بن سەلمان لە یانەی نیوکاسڵ چەند ڕۆژێکە لەگەڵ خوان لاپۆرتای سەرۆکی یانەی بەرشلۆنە و هاوکارانی لەسەرهێڵە، تەوەری گفتوگۆی نێوان دوو جەمسەرەکەش پەیوەندیدارە بە گواستنەوەی عوسمان دێمبیلی هێرشبەری فەرەنسی لە یاریگای کامپ نو بەرەو یاریگای سانت جەیمس پارک.
سەرچاوەکە نووسیویەتی، نرخی ئاسایی دێمبیلی لە بازاڕی گواستنەوەکان لەئێستادا 30 ملیۆن یورۆیە، بەڵام یانەی نیوکاسڵ بڕی 20 ملیۆنیان خستووەتەسەر مێزی گفتوگۆکردن.
خوان لاپۆرتا و هاوکارانی بە ئۆفەرەکەی نوێنەری شازادە قایلبوون، تاوەکو لە شەش مانگی داهاتوودا ناچارنەبن بێبەرامبەر دەستبەرداری ڕەشئەسمەرەکەی فەرەنسا ببن، بەڵام کێشە لەوەدایە لێپرسراوی کارەکانی دێمبیلی بە گواستنەوەی قایلنییە.
دێمبیلی لە وەرزی 2017/2018وە بەبڕی 120 ملیۆن یورۆ پەیوەندی بە بارساوە کرد، تاوەکو ئێستا 129 یاریکردووە، 31 گۆڵی تۆمارکردووە و 24ی ڕەخساندووە.
