بەڕێوەبەرایەتیی گشتیی کارەبای سلێمانی ڕایگەیاند، دوای دوو ڕۆژ کێشەی هێڵى 132 کەى ڤى-ی تاسڵوجە – دوکان بە تەواوى چارەسەرکراوە.
سامان سابیر، لێپرسراوى بەشى هێڵەکان لە بەڕێوەبەرایەتیى گواستنەوەی وزەى کارەباى سلێمانى ڕایگەیاندووە، “دواى ئەوەى ڕۆژی 16ی ئەم مانگە، بەهۆى شۆرتێکى کارەبا هێڵى 132 کەى ڤى-ی تاسڵۆجە – سلێمانى لەکارکەوت، تیمەکان گەیشتنە وێستگەى گۆڕینى کارەباى 132 کەى ڤى ABB ى دوکان بۆ چارەسەرکردنى کێشەکە و گەڕاندنەوەى كارەبا بۆ ناو قەزاى دوکان”.
ئاماژەی بەوەشکردووە، “شۆرتەکە زیانى بە وێستگەى گۆڕینى کارەباى تاسڵوجەش گەیاندبوو، بەڵام دواى دوو ڕۆژ کارکردنى بەردەوام بەرەبەیانى ئەمڕۆ کاتژمێر 4:40 توانییان کێشەکە بە تەواوى چارەسەربکەن و کارەبا بۆ هێڵەکە بگەڕێننەوە”
هاوکات عەبدوڵڵا عەلى، لێپرسراوی بەشى چاکسازیی وێستگەکانى گواستنەوەى کارەباى سڵێمانى ڕایگەیاند، “لە ئێستادا تیمەکانیان سەرقاڵى چاککردنەوەى کێشەى وێستگەى مۆبایلى 132 کەى ڤى-ی تەکییە و وێستگەى ABB ین لە دوکان”.
کارەبای سلێمانی وتووشیەتی، سەرەڕای نالەباریی کەشوهەوا لە دوو ڕۆژی ڕابردوودا، بەڵام تیمەکانیان بەردەوامبوون لە چارەسەرکردنی کێشەکان.
