بەپێی پێشبینییەكانی كەشناسی، ئەمڕۆ ئاسمان ساماڵ دەبێت، پلەكانی گەرما بە نزمی دەمێننەوە و شەختە دروستدەبێت، سبەینێش لە دوای نیوەڕۆوە شەپۆلێکی بەفربارین هەموو هەرێمی کوردستان دەگرێتەوە، بە هەولێریشەوە.
کەشناسیی هەرێمی کوردستان پێشبینییەكانی كەشوهەوای بۆ ئەمڕۆ و سبەینێ ئاشكراكرد، ئەمڕۆ ئاسمان بەگشتی ساماڵ دەبێت، لەكاتەكانی شەودا شەختە دروستدەبێت.
بەڵام لە سبەینێوە شەپۆلێکى بەفربارین تەواوى هەرێمی كوردستان دەگرێتەوە، شەپۆلەكە لە دوای نیوەڕۆوە دەستپێدەكات و شەو كاریگەرییەكانی زیاتر دەبن، بەفر لە سەرجەم پارێزگاكانی هەرێمی كوردستان دەبارێت، بە شاری هەولێریشەوە، كاریگەرییەكەی لەسەر ناوچە شاخاوییەكان زیاتر دەبێت.
كەشناسی ڕاشیگەیاندووە، بارستە هەوایەکى جەمسەریى زۆر سارد یاوەرى ئەم نزمە پاڵەپەستۆیە دەکات، بۆیە شێوازى دابارین لە زۆربەى کاتەکان بە بەفر دەبێت.
کەشناسیی هەرێم پێشبینیشی كردووە، ڕۆژی پێنجشەممە لە کاتەکانى شەو کاریگەریی ئەم شەپۆلە کۆتاییدێت.
