توێژینەوەیەکی نوێ لە ئەفریقای باشوور کاریگەرییەکانی ئۆمیکرۆن لەسەر ئەو کەسانە دەخاتەڕوو کە ڤاکسینیان وەرنەگرتووە، بەراورد بە كاریگەریی گۆڕاوەكانی دیكە، ئاشکرایکردووە، ئەو کەسانەی تووشی ئۆمیکرۆن دەبن و هیچ ڤاکسینێکیان وەرنەگرتووە کەمتر تووشی نیشانە قورسەکانی کۆرۆنا و چوونە نەخۆشخانە دەبن بەراورد بە گۆڕاوەکانی دیکەی کۆرۆنا.
توێژینەوەکە، کە پەیمانگای نیشتمانی بۆ نەخۆشییە کوشندەکان ئەنجامیداوە، بەراوردیکردووە لەنێوان 11 هەزار و 600 نەخۆش لە سێ شەپۆلی یەکەمی ڤایرۆسەکە، لەگەڵ پێنج هەزار و 100 تووشبووی ئۆمیکرۆندا.
ئەنجامەکان دەریانخستووە، کەسی تووشبوو بە ئۆمیکرۆن کەمتر نیشانە مەترسیدارەکانی تێدا دەردەکەوێت، ڕێژەی مردنیش بەهۆیەوە کەمترە بەراورد بە سەرجەم گۆڕاوەکانی پێشوو.
پێشتر ڕۆژی چوارشەممە تیدرۆس ئەدهانۆم بەڕیوەبەری گشتیی تەندروستیی جیهانی، هۆشداریدا لەوەی بڵاوبوونەوەی خێرا و بەرفراوانی ئۆمیکرۆن بەجۆرێکە پێشتر لەسەرەتای سەرهەڵدانی ڤایرۆسی کۆرۆناوە بەو ئاستە تۆمارنەکراوە، ئەمەش گۆڕاوەکە لە ڕیزبەندیی ڤایرۆسە مەترسیدارەکاندا دەهێڵێتەوە، هەرچەندە نیشانە مەترسیدارەکانی کەمتربن.
