ئەمڕۆ پێنجشەممە جارێکی دیکە مامۆستایان لە سەرتاسەری ئێران لە بەردەمی ئیدارەی پەروەردەی شارەکانیان گردبوونەوە و مامۆستایانی سنە پشتگیریی زارا موحەمەدی، مامۆستای وتنەوەی زمانی کوردییان کرد.
مامۆستایان لە سنە بە وتنەوەی دروشمی “ئێمە زارای زمانین ڕاوەستان قەت نازانین و زارا کیژی نیشتمان پاڵپشتتن مامۆستایان” پشتگیریی “زارا محەمەدی”یان کرد کە لەم دواییانەدا ڕەوانەی زیندان کرا.
مامۆستایان هەروەها وتیان، “هاوخەباتین پێکەوە ناوەستین بۆ پێشەوە و نەسرەوتن تا سەرکەوتن”.
مامۆستایان لە شارەکانی ڕۆژهەڵاتی کوردستان لەوانە مەریوان، سنە، کامێران، دێولان، بیجار، بانە، سەقز، بۆکان، سەردەشت و کرماشان بەشداریی ئەو زنجیرە ناڕەزاییانە بوون.
مامۆستایانی ڕۆژهەڵاتی کوردستان ماوەی چەند مانگێکە ناڕازین لە جێبەجێنەکرانی پڕۆژەیاسای پلەبەندیی مامۆستایان و پێشنیازەیاسای هاوتاسازیی مووچەی خانەنشینی.
