ئیسرائیل دەڵێت، ئێران هەوڵیداوە كچانی ئیسرائیلی بكات بە سیخوڕی خۆی، بەڵام شكست بە هەوڵەكەی هێنراوە.
بەپێی میدیای ئیسرائیلی، دەزگای ئاسایشی گشتیی ئیسرائیل (شاباك) ئەمڕۆ چوارشەممە ڕایگەیاندووە، “ئێران هەوڵیداوە چوار كچ و ژنی ئیسرائیلی بكات بە سیخوڕ، ئەو ژن و كچە ئیسرائیلییانە لەدایكبووی ئێرانن و فارسیزانن، پەیوەندییان لەگەڵ كەسێكدا هەبووە كە ئەندامی هەواڵگریی ئێران (ئیتڵاعات)ـە و خۆی وەك جوو ناساندووە و لەناو ئیسرائیلەوە سیخوڕی بۆ ئێران كردووە”.
شاباك دەڵێت، ئەو ژن و كچانە تۆمەتبارن بە وێنەگرتنی باڵیۆزخانەكانی ئیسرائیل و چاودێریكردنی گەورە بەرپرسانی دامەزراوەی ئاسایش و بەرگریی ئیسرائیل و خۆنزیككردنەوە لە ژنە پەرلەمانتارێكی ئیسرائیل.
كەسێكی تر كە هاوسەری یەكێك لەو ژنانەیە، تۆمەتبارە بەوەی لە ڕاپەڕاندنی كاری سیخوڕیكردن بۆ ئێران هاوكار و یارمەتیدەر بووە، وەك میدیای ئیسرائیلی لە زاری دەزگای ئاسایشی گشتیی ئەو وڵاتەوە بڵاویكردووەتەوە.
