شەوی ڕابردوو، پۆلیسی هەولێر لە یەکێک لە کۆمەڵگە گەشتیارییەکانی ئەو شارە، بەتۆمەتی لەشفرۆشی، 100 کەسی دەستگیركردووە، زیاتر لە 70 كەسیان ژن بوون و ”كاری لەشفرۆشییان كردووە”.
سەرچاوەیەکی بەڕێوەبەرایەتیی گشتیی پۆلیسی هەولێر بۆ تۆڕی میدیایی ئێستای ئاشكراكرد، “ڕووداوەکە لە یەکێک لە یانە شەوانەکانی هەولێر ڕوویداوە، کە ماوەی هەشت ساڵە هەیە و پێشتر جارێکی دیکە لەسەر هەمان کار سزادراوە”.
بەپێی سەرچاوەکەی پۆلیس، کاتژمێر 11:00ی شەوی ڕابردوو مەفرەزەیەکی پۆلیس هەڵیکوتاوەتە سەر یەکێک لە یانە شەوانەکانی کۆمەڵگەیەكی گەشتیاری لە هەولێر، 100 کەسیان دەستگیرکردووە، کە زیاتر لە 70 کەسیان ژن بوون.
”ئەوانەی دەستگیرکراون تۆمەتبارن بە لەشفرۆشی”، وەك ئەوەی پۆلیسی هەولێر دەیڵێت.
دەستگیرکراوەکان خەڵکی هەرێمی كوردستان، عێراق، سوریا و ئێران، زۆرینەشیان گەشتیار بوون، بەشیك لە پیاوەكان ژنەکانیان لەگەڵ خۆیاندا هێناوە.
پۆلیس دەشڵێت، بەشێک لە دەستگیركراوەكان سەر بە یانەکە خۆی بوون.
پۆلیسی هەولێر پەڕاوی لێکۆڵینەوەی بۆ ڕووداوەکە کردووەتەوە و تۆمەتبارەکان دەستبەسەرن.
