عەلی حەمەساڵح، پەرلەمانتاری گۆڕان، دوای لافاوەکەی هەولێر شاری زەیتوونی بە گۆڕینی ڕێڕەوی ئاو و هۆکاری لافاوەكە تۆمەتبارکردبوو، ئێستا وەک خۆی دەڵێت، بەڕێوەبەرانی پڕۆژەکە وەک قەرەبوو داوای 37 هەزار دەفتەر دۆلاری لێدەکەن.
عەلی حەمە ساڵح لەسەر داواکەی شاری زەیتوون نووسیویەتی، “شاری زەیتوون، کە تۆمتبارمان کردبووھۆکاری لافاوەکەی ھەولێرە، سکاڵای تۆمارکردووە، داوای 370 ملیۆن دۆلار (37 ھەزار دەفتەر دۆلار)م لێدەکات، بە ھیوای دادگایەکی دادپەروەرانە”.
پێشتر ئەو پەرلەمانتارە دوای لافاوەکەی 17ی کانوونی یەکەمی ساڵی ڕابردووی هەولێر نووسیبووی، “پرۆژەی زەیتون و زەیتون پڵەس و ئاوێنەی شار دروستکرا، ڕێڕەوی ئاوەکە ئاراستەی دارەتوو کرا، ماڵەکان و خەڵک کرانە قوربانیی پرۆژەکان”.
پەرلەمانتارەکەی پەرلەمانی کوردستان ئاماژەی بەوەشکردبوو، “بە یاساش بێت دەبێت ئەوانەی ھۆکارن قەرەبووی خەڵک بکەن، بۆیە کەس یەخەی ئەوەی نەگرت ھۆکاری ئەم دۆخە بوو”.
