گفتوگۆکانی نێوان واشنتن و مۆسکۆ سەبارەت بە قەیرانی ئۆکرانیا ئەمڕۆ دووشەممە لە شاری جنێڤی سویسرا دەستیپێکرد.
کۆبوونەوەکە لەنێوان هەردوو جێگری وەزیرانی دەرەوەی ئەو دوو وڵاتە وێندی شێرمان و سێرگی ڕیباکۆڤ لە بارەگای نوێنەرایەتیی ئەمریکا دەستیپێکرد.
بارەگای نوێنەرایەتیی ئەمریکا لە جنێڤ تەنها چەند مەترێک لە بارەگای نوێنەرایەتیی ڕوسیاوە دوورە لە نزیک بارەگای نەتەوە یەکگرتووەکان.
لە دوای دیداری نێوان جۆ بایدن و ڤلادیمێر پوتین، ئەوە سێیەم دیداری نێوان شێرمان و ڕیباکۆڤە.
یەکەم کۆبوونەوەی نێوان هەردوو جێگری وەزیری دەرەوەی ئەمریکا و ڕوسیا لە 28ی حوزەیرانی ساڵی ڕابردوودا لە بارەگای نوێنەرایەتیی ئەمریکا لە سویسرا ئەنجامدرا، دواتریش لە بارەگای نوێنەرایەتیی ڕوسیا لە 30ی ئەیلولی 2021 دیداری دووەمیان ئەنجامدا.
بەر لە دەستپێکردنی گفتوگۆکان هەریەکە لە ئەمریکا و ڕوسیا هەڵوێستی یەکلایی خۆیان لەبارەی ئۆکرانیاوە ئاشکراکرد و واشنتن هۆشداریدا لە مەترسییەکانی ڕوودانی هەر ڕووبەڕووبوونەوەیەکی سەربازی، لەبەرامبەردا مۆسکۆ ڕەتیکردەوە هیچ سازشێک بکات.
ئەنتۆنی بلینکن وەزیری دەرەوەی ئەمریکا پێشتر ڕایگەیاندبوو، ڕوسیا ئێستا بووەتە دوژمنێکی نوێ و مەترسیدار بۆسەر ئۆکرانیا، دەکرێت لەڕێگەی دیپلۆماسییەوە کێشەی کۆکردنەوەی هێزەکانی ڕوسیا لەسەر سنوورەکانی چارەسەربکرێت، هەروەها داواشی لە وڵاتانی ئەوروپا کرد هەوڵەکانیان بخەنەگەڕ بۆ دروستکردنی فشار لەسەر ڕوسیا بۆ کشاندنەوەی هێزەکانی لەسەر سنوورەکانی لەگەڵ ئۆکرانیا.
سەرەڕای ئەم گفتوگۆیانەش ڕۆژی چوارشەممەی ڕابردوو کۆبوونەوەی نێوان هاوپەیمانیی ناتۆ و ڕوسیا، هەروەها کۆبوونەوەی نێوان ڕێکخراوی ئاسایش و هاوکاریی ئەوروپا لەگەڵ ڕوسیا لەسەر هەمان پرس ئەنجامدرا، لەپێناو ڕێگریکردن لەهەر هەنگاوێکی ڕوسیا بۆ هێرشکردنەسەر ئۆکرانیا.
