بەهۆی تەقینەوەی بۆمبێكەوە لە باشووری ڕۆژهەڵاتی توركیا لەسەر سنوورەكانی لەگەڵ سوریا، سێ سەربازی توركیا كوژران.
وەزارەتی بەرگریی توركیا ڕایگەیاند، سەربازەكان لە شارۆچكەی ئەقجە قەڵا لە پارێزگای شانلی ئۆرفە كوژراون، دوای ئەوەی بۆمبێكی دروستكراوی ناوخۆ پێیاندا تەقیوەتەوە.
شارۆچكەكە دەكەوێتە بەرامبەر شارۆچكەی گرێسپی لە ڕۆژئاوای كوردستان، كە لەژێر كۆنترۆڵی هێزەكانی توركیا و گروپە سورییەكاندایە، لەدوای ئەوەی ئەنقەرە لە تشرینی یەكەمی 2019 هێرشی كردەسەری.
وەزارەتی بەرگری ئاماژەی بە ناوی لایەنی ئەنجامدەری هێرشەكە نەكرد، كە بە “تیرۆریست” ناوی هێنا، بەڵام پێدەچێت مەبەستی شەڕڤانانی كورد بێت لە ڕۆژئاوای كوردستان، بەو پێیەی بەپێی ڕاگەیەندراوێكی دواتری وەزارەتەكە، لە هێرشێكدا بە وتەی خۆیان 12 چەكداری یەكینەكانی پاراستنی گەل-یان وەك تۆڵەكردنەوە كوشتووە.
