تەندروستیی فەرەنسا: جگەرەی ئەلیكترۆنی ڕێگا نییە بۆ وازهێنان لە جگەرەی ئاسایی

دوای چەندین ساڵ لەمشتومڕ سەبارەت بە جگەرەی ئەلیکترۆنی و سوود و زیانەکانی ‏بەراورد بە جگەرەی ئاسایی، بەڵام بۆچوونەکان تائێستا لەبارەیەوە جیاوازن، لەو نێوەندەدا ‏دەسەڵاتی تەندروستیی فەرەنسا ڕەتیدەکاتەوە جگەرەی ئەلیکترۆنی ڕێگایەک بێت بۆ ‏وازهێنان لە جگەرەی ئاسایی، لەگەڵ ئەوەی دەسەڵاتی تەندروستیی بەریتانیا وەک یەکێک ‏لە ڕێگاکان پشتی پێبەستووە.‏

ئەنجومەنی گشتیی تەندروستیی فەرەنسا ڕایگەیاند، “تائێستا ناتوانرێت وەک ڕێگایەکی ‏دروست بۆ وازهێنان و دوورکەوتنەوە لە جگەرەی ئاسایی پشت بە جگەرەی ئەلیکترۆنی ‏ببەسترێت و ڕێگایەک نییە بۆ کەمکردنەوەی زیانەکانی جگەرەکێشان”.‏

لەگەڵ ئەوشدا جگەرەی ئەلیکترۆنی لەپێکهاتەکەیدا قەتران و یەکەئۆکسیدی کاربۆنی تێدا ‏نییە، کە بە دوو پێکهاتەی سەرەکیی جگەرە دادەنرێن و هۆکاری تووشبوونن بە ‏نەخۆشییەکانی شێرپەنجە، دڵ و کۆئەندامی دەمار.‏

لەبەرامبەردا جگەرەی ئەلیکترۆنی لەپێکهاتەکەیدا بڕێکی زۆر نیکۆتین هەیە، کە وادەکات ‏کەسی جگەرەکێش بەردەوامبێت لە ئالودەبوون بە جگەرەکێشان، هەروەها ئەو دووکەڵەی ‏کەسی بەکارهێنەر دەچێتە جەستەیەوە، تائێستا نازانرێت زیانە دوورمەوداکانی چین. ‏

لەساڵی 2019دا ئەکادیمیای زانستە پزیشکییەکانی فەرەنسا وەڵامی ڕێکخراوی ‏تەندروستیی جیهانیی دایەوە بەوەی کە “بێگومان جگەرەی ئەلیکترۆنی زیانبەخشە”.‏

ئەو خاڵەی کە هیچ لایەنێکی جیهانی گومانیان لێینییە، ئەوەیە، كە جگەرەی ئەلیکترۆنی ‏زیانەکانی کەمترە لە جگەرەی ئاسایی. ‏

بەڵام سەرجەم لایەنە تەندروستییەکانی جیهان سوورن لەسەر ئەوەی جگەرەی ئەلیکترۆنی ‏ناتوانێت ببێتە دەرچەیەک بۆ ڕزگاربوون لە زیانەکانی جگەرەکێشان و ئامۆژگاریی دەدەن ‏بەوەی نەکێشرێت، دووپاتیدەكەنەوە جگەرەی ئەلیكترۆنی بێزیان نییە.‏

بابەتی پێشتر

چێوەی هەماهەنگی ناوەرۆكی كۆبوونەوەكەی لەگەڵ شاندی كورد ئاشكرادەكات

بابەتی دواتر

(NBA) لەیکەرز لە هوکسی بردەوە و جەیمس 32 خاڵی تۆمارکرد

بابەتی پەیوەندیدار