بهپێی توێژینەوەی یهكێك له زانكۆكانى ئهمریكا، بەهۆی زۆریی گۆڕانی پێکهاتەی ڤایرۆسهكه، چاوەڕوان دەکرێت شهپۆلی گۆڕاوى ئۆمیکرۆن لە داهاتوویەکی نزیکدا کۆتایی بێت.
زانكۆی فلۆریدا-ى ئهمریكى توێژینهوهیهكی پزیشكیی ئەنجامداوە، سهرهڕاى ئهوهى گۆڕاوی ئۆمیکرۆن بهشێوهیهكى خێرا بڵاودهبێتهوه و ئامارەکانی گەیشتوونەتە بەرزترین ئاست، بەڵام بەهۆی زۆریی گۆڕانی پێکهاتەی ڤایرۆسهكه و کەمی کاریگەرییەکانى و گرتنەبەری ڕێکاری خۆپارێزی لهلایهن وڵاتانهوه، چاوەڕوان دەکرێت لە داهاتوویەکی نزیکدا شهپۆلی گۆڕاوەكە کۆتایی بێت.
ئیرا لۆنجینی، مامۆستاى زانكۆكه ڕایگهیاندووه، شهپۆلی گۆڕاوى ئۆمیكرۆن خێراتربووە لەوەی زانایان چاوەڕێیان دەکرد، بهڵام ئهو بڵاوبوونهوهیه بهو شێوهیه مایهى سهرسووڕمان نهبووه.
بهوتهى ئهو مامۆستایهى زانكۆی فلۆریدا، تووشبووانی ئۆمیکرۆن سێ ڕۆژ پێویستیان بە کەرەنتین هەیە، لەکاتێکدا تووشبووانی دەلتا کۆرۆنا پێنج ڕۆژ کەرەنتین دەکران، ئەوەیش وەک هۆکارێکی خێرا بڵاوبوونەوەی پەتاکە دەردەکەوێت.
پێشبینیی ئهوهشیكردووه، لهههفتهى دووهمى ئهم مانگه شهپۆلی ئۆمیكرۆن دهگاته ترۆپك و كهمبوونهوهى شهپۆلهكهش له ناوهڕاستى مانگی داهاتوودا دهبێت.
