لەگەڵ بڵاوبوونەوەی فراوان و تۆمارکردنی ژمارەیەکی زۆری تووشبووانی ئۆمیكرۆن لەسەرتاسەری جیهان، توێژینەوەیەکی نوێ دەریدەخات ئەوانەی تووشی گۆڕاوە نوێكە دەبن و چاکدەبنەوە، بەرگریی جەستەیان بەرامبەر سەرجەم گۆڕاوەکان و تەنانەت گۆڕاوی دەلتاش بەهێزە.
پێگەی پەیمانگای ئەفریقا بۆ توێژینەوەی تەندروستی – AFRICA HEALTH RESEARCH INSTITUTE توێژینەوەیەکی بڵاوکردووەتەوە کە لە ئەفریقای باشوور ئەنجامدراوە و دەڵێت، ئەوانەی لە ئۆمیکرۆن چاکدەبنەوە، جەستەیان بەرگری دژی سەرجەم گۆڕاوەکان دروستدەکات، بە دەلتاشەوە کە بەهێزترینیانە.
ئەلێکس سیگڵ توێژەر و پسپۆڕ لە زانستی ڤایرۆسناسی لە پەیمانگاكە، کە سەرپەرشتیی توێژینەوەکەی کردووە، دەڵێت، “کەمبوونەوەی ژمارەی تووشبووانی دەلتا هەواڵێکی دڵخۆشکەرە، لەکاتێکدا دەتوانین لەگەڵ گۆڕاوی ئۆمیکرۆن هەڵبکەین و کەمتر لەگۆڕاوەکانی دیکە سەختی دروستدەکات”.
جەختیشیکردووەتەوە، ئەوانەی لە باشووری ئەفریقا تووشی ئۆمیکرۆن بوون و بە چەند هەفتەیەک پێشتری ئەو تووشبووانەن کە لە ئەمریکا تۆمارکراون، دەرکەوتووە سەرجەم ئەوانەی چاکبوونەتەوە بەرگرییان دژی دەلتا و سەرجەم گۆڕاوەکانی دیکەش دروستکردووە.
توێژینەوەکە دەریدەخات، ئەوانەی بەشدارییان لە تویژینەوەکەدا کردووە، پشکنینیان بۆ کراوە بۆ دڵنیابوونەوە لە بەرگرییان بەرامبەر دەلتا و ئۆمیکرۆن، دروستبوونی بەرگری لەوکەسانەدا دژی گۆڕاوی ئۆمیکرۆن کارێکی ئاسایی و چاوەڕوانکراوبووە، بەڵام دروستبوونی بەرگری دژی دەلتا هەواڵێکی دڵخۆشکەر و چاوەڕواننەکراو بووە.
هەر بەپێی توێژینەوەكە، هەرچەندە گۆڕاوی ئۆمیکرۆن خێرایە لە بڵاوبوونەوە و ئەمەش هۆکارە بۆئەوەی ژمارەیەکی زۆری خەڵک تووشی ببن، بەڵام بەهۆی ئەوەی نیشانەکانی سوکن و کەسی تووشبوو زیاتر بەرگریی بەرامبەر بە نەخۆشییەکە هەیە، دەتوانرێت لەگەڵیدا هەڵبکرێت، لەکاتێکدا بۆ گۆڕاوی دەلتا بەوجۆرە نییە و بەشێکی زۆری تووشبووەکانی بە قورسی نیشانەکانیان تێدا دەردەکەوێت.
