حکومەتی تورکیا لە یەکەم ڕۆژی ساڵی نوێدا نرخی گازی سروشتیی ماڵان و کارەبای بە ڕێژەی 50% تا 100% بەرزكردەوە، نرخی بەنزینیش بەهەمانشێوە بەرزكراوەتەوە.
ناوەندی چاودێری بازاڕی وزە لە تورکیا ئاشکرایکردووە، “نرخی کارەبا بۆ هاوڵاتیی تورکی بەڕێژەیەک بەرزکراوەتەوە و بۆ هاوبەشە بازرگانییەکانیش 100% نرخەکەی بەرزکراوەتەوە”.
هاوکات نرخی گازی سروشتیی ماڵان بە ڕێژەی 25% بۆ هاوڵاتیی تورکی بەرزکراوەتەوە و بۆ شوێنە بازرگانییەکان 50% زیادیکردووە، لە کاتێکدا پێشتر تەنها 15% بۆ شوێنە بازرگانییەکان نرخ بەرزکرابوویەوە.
ئاژانسی ڕۆیتەرز لەبارەی بەرزكردنەوەی نرخ لە توركیا زانیاریی لەبارەی بەنزین و گازوایل داوە، بەپێی ئامارێک دوێنێ هەینی نرخی بەنزین لە تورکیا بەرزبووەتەوە، بەشێوەیەک نیو لیرە تا یەک لیرە بۆ لیرتێک بەنزین زیادبووە.
پێشتر گۆڤاری ئیكۆنۆمیست-ی ئەمریكی ڕایگەیاندبوو، “ڕەجەب تەیب ئەردۆغان سەرۆكی توركیا ناتوانێت بۆ ماوەیەكی درێژ بەرەنگاری لەگەڵ لۆژیكدا بكات بەهۆی سیاسەتە ئابورییەكانی، كە دەبێتە هۆی زیادبوونی مەترسییەكان لەسایەی ناسەقامگیریی بەهای لیرە و ڕەتكردنەوەی بەرزكردنەوەی نرخی سوود”.
