لە نیوەشەوی ڕابردووەوە هەینی لەسەر شەممە، هیچ هێزێكی شەڕكەری بیانی لەسەر خاكی عێراق نەماوە، بەپێی ئەو ڕێككەوتنەی پاش چوار گەڕی گفتوگۆ لەنێوان بەغداد و واشنتن ئەنجامدرا، بەمەش لەمڕۆوە عێراق یەكەم ساڵی بێ هێزە شەڕەكەرەكان دەستپێدەكات.
ڕێككەوتنەكە، كە چەند مانگێك گفتوگۆی خایاند و لە تەمموزی ساڵی ڕابردوو كۆتایی هات، بەپێی ناوەڕۆكەكەی، هێزە شەڕەكەرەكانی سەر بە هاوپەیمانیی نێودەوڵەتی كە لەلایەن ئەمریكاوە دژ بە داعش سەرۆكایەتی دەكرا، دەچنە دەرەوە، تەنها ژمارەیەكی دیاریكراوی ڕاوێژكارانی سەر بە هاوپەیمانییەكە بۆ ڕێنوێنی و ڕاوێژ بە هێزە عێراقییەكان دەمێننەوە.
مستەفا كازمی، سەرۆك وەزیرانی عێراق لە یەكەم ڕاگەیەندراوی خۆیدا لە ساڵی 2022 وتی، ساڵی ڕابردوو “ساڵی چوونە دەرەوەی هێزە بیانییەكان بوو لە عێراق، گۆڕینی بە ژمارەیەك لە ڕاوێژكاران بۆ پشتیوانی لە هێزەكانمان لە جەنگی دژ بە داعش، پاش ئەوەی هێزەكانمان سەركەوتووبوون لە لەناوبردنی گەورە سەركردەكانی ڕێكخراوە تیرۆرستییەكە”.
كازمی وتیشی، ساڵی 2022 ساڵی گەڕانەوەی متمانەی گەلە بە دامەزراوەكانی دەوڵەت.
سایتی عەرەبی جدید لە زاری گەورە بەرپرسێكی حكومییەوە بڵاویكردەوە، حكومەت هەوڵی گەوەیدا لەماوەی چەند مانگی ڕابردوودا بۆ زامنكردنی جێبەجێكردنی ڕێككەوتنەكە و دوورخستنەوەی وڵات لە قەیرانێكی ئەمنیی دیكە و دۆخی ناسەقامگیر.
هێزەكانی هاوپەیمانیی نێودەوڵەتی بە سەرۆكایەتی واشنتن لە ساڵی 2014دا هاتە ناو عێراق پاش كۆنتڕۆڵكردنی چەند شارێك لە باكوور و ڕۆژئاوای عێراق لەلایەن داعشەوە.
هاوپەیمانییەكە بەشداربوو لە ئازادكردنی شار و ناوچەكان لەدەست چەكدارانی داعش، تا ئەوەی عێراق لە ساڵی 2017دا سەركەوتنی بەسەر داعشدا ڕاگەیاند، سەرەڕای ئەوەی هێرشی ناوبەناو و بۆردومانی ئاسمانی هاوپەیمانان بۆسەر پاشماوەی چەكدارانی ڕێكخراوەكە تا ئەمدواییە بەردەوام بوو.
