هەزاران کەس لە ڕۆژئاوای کوردستان بەهۆی بۆردومانەکانی تورکیاوە لەهەفتەی ڕابردوودا ئاوارەبوون، ئەوەش بە گەورەترین شەپۆلی ئاوارەبوون دادەنرێت لە دوو ساڵی ڕابردوودا.
ڕۆژنامەی ئیندیپێندنت-ی بەریتانی بڵاویکردەوە، ئەو شەپۆلی ئاوارەبوونە دوای ئەوە دێت کە لە دوایین بۆردومانی تورکیادا بۆسەر ناوچەکانی پارێزگای حەسەکە، لانیکەم 10 هاوڵاتیی کورد شەهیدبوون، کە لەناویاندا منداڵێکی تەمەن شەش مانگ هەبووە.
هەروەها ڕوانگەی سوری بۆ مافەکانی مرۆڤ ئاشکرایکردووە، تورکیا لەماوەی چەند هەفتەی ڕابردوودا هێرشەکانی بۆسەر ناوچەکانی ڕۆژئاوای کوردستان چڕکردووەتەوە.
ئەو شوێنانەی تورکیا بۆردوومانیان دەکات ناوچەکانی ژێر دەسەڵاتی هێزەکانی سوریای دیموکراتن لە ڕۆژئاوای کوردستان.
ئەمە لەکاتێکدایە ئەو ناوچەیەی ڕۆژئاوای کوردستان ڕووبەڕووی قەیرانێکی توندی بێئاوی و وشکبوونەوە بووەتەوە لەماوەی 70 ساڵی ڕابردوودا، گرفتەكەش بەهۆی گرتنەوەی ئاو لەلایەن توركیاوە سەریهەڵداوە،. بۆیە هۆشداری لەمەترسیی برسێتی لەساڵی 2022 لەو ناوچەیە دراوە.
جگە لە فشار و بۆردوومانەكانی توركیا، داخستنی خاڵی سنووریی نوووان ڕۆژئاوا و هەرێمی كوردستان، كە تاکە دەروازەی ناردنی پاڵپشتی و پێداویستیی خۆراکی و پزیشکییە بۆ ناوچەکە، یەکێکی دیکەیە لەو کاریگەرییانەی ڕۆژئاوای كوردستانی تووشی قەیران کردووە.
لە هەفتەی ڕابردووشدا ڕێکخراوی تەندروستیی جیهانی زەنگی مەترسیی لەبارەی دۆخی سوریاوە لێدا، ڕایگەیاند، دەستپێکردنەوەی شەڕ لەسوریا وایکردووە 140 هەزار کەس کە پێویستییان بە فریاگوزاریی تەندروستییە، ئاوارەببن.
نەتەوە یەکگرتووەکان ئاماژەی بەوەکردووە، هەزار و 200 خێزان لە ڕۆژئاوای کوردستان و پارێزگای حەسەکە لە هەفتەی ڕابردوودا ئاوارەبوون، دەشڵێت، تائێستا ئەو ناوچەیە شەپۆلی ئاوارەبوونی بەرفراوانی هاوشێوەی بەخۆوە نەبینیوە لەوەتەی تورکیا هێرشی بۆسەر ڕۆژئاوای کوردستان دەستپێکردووە لەساڵی 2019وە.
