خانەی ڕاپەڕاندنی بزوتنەوەی گۆڕان داوای لێبوردن لە دەنگدەرانی بزوتنەوەكە دەكات، شكستی بزوتنەوەكە لە هەڵبژاردن دەخاتە ئەستۆی خانەكە، دەڵێت، “پێویستمان بە گۆڕانکاری و بەخۆداچوونەوەی ڕیشەیی بزوتنەوەکە و سیاسەتەکانی ھەیە”.
بزوتنەوەكە پێشی وایە دەنگدەرانی ھەڵوێستیان وەرگرتووە و زۆرینەیان بایکۆتی ھەڵبژاردنیان کردووە.
دەقی پەیامەكەی خانەی ڕاپەڕاندنی بزوتنەوەی گۆڕان
ھاوڵاتیانی ھەرێمی کوردستان..
گۆڕانخوازان..
ئەنجامە بەراییەکانی ھەڵبژاردنی ئەنجومەنی نوێنەرانی عێراق دەریخست، کاندیدەکانی بزوتنەوەی گۆڕان دەنگی پێویستیان نەھێناوە و سەرنەکەوتوون.
لێرەوە، دوای سوپاس و پێزانینمان بۆ بانگەشەکاران و ھەڵسوڕاوانی دڵسۆز، داوای لێبوردن لە دەنگدەرانی بزوتنەوەی گۆڕان دەکەین، دان بەوەدا دەنێین ھەڵە و کەموکوڕی لە ئێمە بووە، سەرەڕای هەلومەرجە بابەتیەکان، بۆیە متمانەی خەڵکمان بەدەستنەھێناوە.
بە ڕاشکاوی دەڵێین پێویستمان بە گۆڕانکاری و بەخۆداچوونەوەی ڕیشەیی بزووتنەوەکە و سیاسەتەکانی ھەیە، چونکە دەنگدەرانمان ھەڵوێستیان وەرگرتووە و زۆرینەیان بایکۆتی ھەڵبژاردنیان کردووە، وەک چۆن زۆرینەی ھاوڵاتییان ھەمان شتیان کردووە.
ئەم واقعە تاڵەش، پێویستی بە بڕیار و ھەڵگرتنی بەرپرسیارێتیە، ئێمە ئامادەین ئەو بەرپرسیارێتییە لەئەستۆ بگرین و لە نزیکترین کاتدا گۆڕانکاری ڕیشەیی بکەین.
خانەی ڕاپەراندن
11/10/2021
