پەرلەمانتارێكی شیعەكان دەڵێت، بڕیارەكەی عێراق بۆ دەركردنی هێزەكانی ئەمریكا مایەی پاشگەزلێبوونەوە نییە، ئێستا ئەمریكا لەژێر فشاردایە.
عامر فائیز، كاندیدی براوەی هەڵبژاردنی ئەنجومەنی نوێنەرانە و لە خوولی پێشوودا پەرلەمانتاری هاوپەیمانیی فەتح (كۆكەرەوەی زۆرینەی گروپەكانی حەشدی شەعبی) بوو، لە لێدوانێكدا ڕایگەیاند، “بڕیارەكەی ئەنجومەنی نوێنەران تایبەت بە كشانەوەی هێزەكانی ئەمریكا لە عێراق، مایەی مشتومڕ و پاشگەزلێبوونەوە نییە”.
بەپێی وتەی عامر فائیز، “حكومەتی ئەمریكا كەوتووەتەژێر فشاری ناوخۆیی و دەرەكییەوە بەمەبەستی كشاندنەوەی هێزەكانی لە عێراق”.
وتیشی، لە كۆتایی ئەمساڵدا تەنها ئەو هێزانە دەمێننەوە كە بۆ ڕاوێژكاری و مەشقپێكردن لە عێراق دەبن و ئەمەش بەپێی ڕێككەوتنی هەردوولا كراوە”.
لە چەند هەفتەی ڕابردوودا بەشێك لە گروپەكانی حەشدی شەعبی هەڕەشەیان لە ئەمریكا كرد ئەگەر هێزەكانی لە عێراق نەكشێنێتەوە، ئەوا هێزەكانی ڕووبەڕووی هێرش و پەلاماری ئەوان دەبنەوە.
