دوو ژنی ئەڵمانی لە ویلایەتی “تورینگن” کاتێک بە سەگەکانیانەوە پیاسەیان کردووە، بەشەڕهاتوون و بەهۆیەوە یەکێک لە ژنەکان قەپیکردووە بە قاچی ژنەکەی دیکەدا و برینداریکردووە.
چیرۆکەکە لەوێوە دەستیپێکردووە کە ژنێکی تەمەن 51 ساڵ لە سەگەکەی خۆی داوە و ژنێکی 27 ساڵیش سەرزەنشتیکردووە بۆچی بەوشێوەیە لە سەگەکەی دەدات، ژنە بەتەمەنەکە وتوویەتی، “من ئەزموونی بەخێوکردنی سەگم لە تۆ زیاترە و بەو شێوەیە دەمەقاڵێکە دروستبووە”.
لە کاتی دروستبوونی ناکۆکییەکەدا ژنە بەتەمەنەکە دەکەوێتە سەرزەوی، لەو کاتەدا ژنە 27 ساڵانەکە دەیەوێت لێیبدات، بەڵام ئەو قەپ دەکات بە قاچی ژنە گەنجەکەدا و برینداریدەکات.
بەپێی وتەی پۆلیسی ئەڵمانی لە کاتی شەڕەکەی نێوان ئەو دوو ژنەدا سەگەکانیان پێکەوە سەیری شەڕەکەیان کردووە.
دوای گەیشتنی پۆلیس شەڕەکە براوەتە دادگا و ژنە گەنجەکە لە دادگا سکاڵای کردووە کە لەلایەن ئەو ژنەوە بە قەپ بریندارکراوە.
