فیدراسیۆنی سەراسەری پەنابەران ژمارەی قوربانییان و ڕزگارکراوان، هەروەها بێسەروشوێنبووانی نوقبوومی بەلەمەكانی کۆچبەرانی لەچەند ڕۆژی ڕابردوودا بڵاوکردەوە، کە دوایینیان دوێنێ 25ی کانونی یەکەم ڕوویدا و تێیدا 16 کۆچبەر خنکاون.
هیوا خدر، ئەندامی فیدراسیۆنی سەراسەری پەنابەران ڕایگەیاند، دوێنێ شەممە 25ی کانونی یەکەم بەلەمێکی کۆچبەران لە دەریای ئیجە نوقمبوو، کە 80 کۆچبەری تێدابووە، لەکۆی ئەو کۆچبەرانە 61 کەسیان ڕزگارکراون و 16یان گیانیان لەدەستداوە.
ئەندامەكەی فیدراسیۆنی پەنابەران ڕاشیگەیاندووە، لەماوەی سێ ڕۆژی ڕابردوودا بەهۆی نوقمبوونی بەلەمی کۆچبەرانەوە، بەلایەنی کەمەوە 30 کۆچبەر لە ئاوەکانی یۆنان گیانیان لەدەستداوە.
تا ئێستا ناسنامەی قوربانییەكانی سێ بەلەمە نوقمبووەكەی چەند ڕۆژی ڕابردووی یۆنان ئاشكرانەكراون.
بەپێی ئەو ئامارانەی ئەندامەكەی فیدراسیۆنی سەراسەری پەنابەران بڵاویكردووەتەوە، لە 19ی کانونی دووەمی ئەمساڵەوە زیاتر لە 116 هەزار کۆچبەر لەڕێی دەریای سپی ناوەڕاستەوە گەیشتوونەتە وڵاتانی یەکێتیی ئەوروپا.
پێشتریش وەزارەتی گواستنەوەی تورکیا بڵاویكردبووەوە، تەنها لەماوەی سێ ڕۆژی ڕابردوودا 160 کۆچبەر کە بەلەمەکانیان نوقمبووە، ڕزگارکراون، لەسەرتاسەری ئەمساڵیشدا 29 هەزار کۆچبەر ڕزگارکراون.
