حكومەتی توركیا پارەی 770 كەسایەتی و دامەزراوەی سڕكرد، بەشێكیان بە بوونی پەیوەندییان لەگەڵ پەكەكە و هاوكاریكردنی تۆمەتباركراون.
ئەمڕۆ هەینی میدیای فەرمیی توركیا بڵاویكردەوە، “حكومەتی توركیا پارەی 770 كەسایەتی و دامەزراوەی بەهۆی پارەداركردنی تیرۆرەوە سڕكردووە كە بارەگاكانیان لە ئەمریكان”.
بەشێك لەو كەسایەتی و دامەزراوانە، تۆمەتباركراون بەوەی پەیوەستن بە فەتحوڵڵا گیولەن، كەسایەتیی ئۆپۆزسیۆنی توركیا و نەیاری ڕەجەب تەیب ئەردۆغان سەرۆك كۆماری ئەو وڵاتە.
گیولەن لەلایەن توركیاوە تۆمەتباركراوە بە ئەنجامدانی ئەو كودەتایەی ساڵی 2016 لە توركیا كرا و شكستیپێهێنرا. ئەو كەس و دامەزراوانەی بە تۆمەتی پەیوەندیگرتنیان لەگەڵ گیولەن پارەكانیان سڕكراون، ژمارەیان 400 كەس و دامەزراوەن، لەنێویاندا دامەزراوەی نیاگارا هەیە كە بارەگاكەی لە شیكاگۆیە.
بەپێی میدیای فەرمیی توركیا، 200 كەسی تر لەو 770 كەسایەتی و دامەزراوەیەی سزادراون و پارەكانیان سڕكراون، تۆمەتبارن بە هاوكاریكردنی پارتی كرێكارانی كوردستان پەكەكە و ڕێكخراوی داعش.
