لیوا – حسێن سەلامی فەرماندەی گشتیی سوپای پاسدارانی ئێران دەڵێت، مانۆڕە سەربازییەكانمان پەیامێكی ڕوونن بۆ ئیسرائیل و دەستەكانیان دەبڕینەوە.
فەرماندەی گشتیی سوپای پاسدارانی ئێران ئەمڕۆ هەینی ڕایگەیاند، “ئەو مانۆڕانەی سوپای پاسداران لە شارە كەناراوییەكانی سەر كەنداو و دەریای عوممان دەیانكات، پەیامێكی جددی و ڕوون و ڕاستەقینە و مەیدانین بۆ هەڕەشەكانی سەرانی ئیسرائیل، لەو ڕێگەیەوە وەڵامی هەڕەشەی سەركردەكانی داگیركاریی ئیسرائیل دەدەینەوە “.
لیوا – حسێن سەلامی هەڕەشەیكرد و وتی، ئەوەی ڕاهێنانەكانمان لە كردەی سەربازیی ڕاستەقینە جیادەكاتەوە، تەنها گۆڕینی ئاراستەی تەقاندنی مووشەكەكانە و دەبێت زایۆنییەكان ئاگایان لە هەڵەكانیان بێت و ئەگەر هەر هەڵەیەك بكەن دەستەكانیان دەبڕینەوە”.
ماوەیەكە هەندێك سەرچاوەی میدیایی ئیسرائیل و خۆرئاوا باس لەوە دەكەن كە تەلئەڤیڤ ئامادەكاری دەكات بۆ ئەگەری پێكدادان لەگەڵ ئێراندا، بەمدواییانەش كەنیست (پەرلەمان)ی ئیسرائیل دەنگی دا بە زیادكردنی بودجەی بەرگریی وڵاتەكەی.
