زیانەکانی لافاوەکەی هەولێر 20 بۆ 21 ملیار دینارن

پارێزگاری هەولێر بڕی زیانەکانی لافاوەکەی ڕۆژی 17ی ئەم مانگەی لە هەولێر ڕاگەیاند و بەپێی خەمڵاندنی لایەنە پەیوەندیدارەکان، ئەو زیانانەی بەهۆی لافاوەکەوە بەر پارێزگاکە کەوتوون بایی 20 بۆ 21 ملیار دینارن.

بەپێی وتەی ئومێد خۆشناو، زیانە گیانییەکان گیانلەدەستدانی 12 کەسن کە تەرمی 10یان دۆزراونەتەوە و دوو کەسیان تائێستا بێسەروشوێنن.

لە کۆنگرەیەکی ڕۆژنامەوانیدا ئومێد خۆشناو ڕایگەیاند، لافاوەکە 15 شوێنی لە گوند، ناحیە، قەزاکان و ناوشاریش گرتووەتەوە و زیانەکان بەکۆی گشتی 20 بۆ 21 ملیار دینار دەخەمڵێندرێن.

بەپێی ئەو بەدواداچوونانەی لیژنە تایبەتمەندەکان کردوویانە، دوو هەزار و 509 خێزان کەلوپەلی ناوماڵیان بەتەواوی لەدەستداوە، 402 خانوو زیانی زۆریان بەرکەوتووە، 867 ئۆتۆمبێل زیانیان بەرکەوتووە کە بەشێکیان حکومین، 153 دوکان، مارکێت و گەراج زیانیان بەرکەوتووە، بەشێکی زۆر لە زەویی کشتوکاڵی و ئاژەڵ زیانیان بەرکەوتووە.

ئەو زیانانەی بەر موڵکی گشتی كەوتوون زۆرن لەوانە شەقامەکان، تۆڕەکانی کارەبا و ئاو، هەروەها بەنداوەکانی بێستانە و کەردز کە زیانی زۆریان بەرکەوتووە و مەترسییان لەسەرە و ئێستا تیمەکان بۆ چاککردنەوەیان کاریان تێدادەکەن.

ڕاشیگەیاند، “ئەمڕۆ هەژمارێکی نێودەوڵەتیی دیکەمان بۆ ڕەوەندی کورد و ڕێکخراوەکانی دەرەوەی وڵات کردووەتەوە تاوەکو لەوڕێگەیەوە هاوکارییەکان بگەیەندرێنە زیانلێکەوتووەکانی لافاوەکە، ئەمڕۆ ئەو هەژمارە ڕادەگەیەنین”.

داواشی لە حکومەتی عێراق کرد لە بودجەی فریاکەوتن پاڵپشتیی هەرێمی کوردستان و هەولێر بکات، چونکە زیانەکان زۆرن و مافێکی یاسایی و دەستووریی هەرێمی کوردستانە.

وتیشی، “داواکاریمان  داوەتە نێردەی وڵاتانی جیهان و هیوادارین هاوکار و پاڵپشتمان بن”.

پارێزگاری هەولێر ڕایگەیاند، کە ئەمساڵ وەک پارێزگا هیچ بۆنەیەکیان بۆ سەری ساڵی نوێ نابێت.

بابەتی پێشتر

باڵیۆزخانەی ئەمریكا لە ناوجەرگەی بەغدادەوە مووشەكباران كرا

بابەتی دواتر

سزای سێدارەی بەندكراوێكی سیاسیی كورد لە سنە جێبەجێكرا

بابەتی پەیوەندیدار
Total
0
Share