بۆ هاوكاریكردنی زیانلێكەوتووانی لافاوەكەی هەولێر، لە سلێمانی ژمارەیەك لە ڕێكخراوەكانی كۆمەڵی مەدەنی كەمپەینێكی سێ ڕۆژەیان ڕاگەیاند.
كەمپەینەكە بە سەرپەرشتی هەشت ڕێكخراوی كۆمەڵی مەدەنی و بە هاوكاریی لایەنە پەیوەندیدارەكانی پارێزگای سلێمانی ئەمڕۆ دەستیپێكردووە.
پەری عومەر، سەرۆكی یەكێك لە ڕێكخراوە بەشداربووەكان بە تۆڕی میدیایی ئێستای ڕاگەیاند، ئامانج لە كەمپەینەكەیان گەیاندنی دەستی یارمەتییە بۆ زیانلێكەوتووانی لافاو لە هەولێر.
وتیشی، لەمیانەی سێ ڕۆژی كەمپەینەكەدا، كە لەمڕۆوە دەستیپێكردووە، كەلوپەل و پێداویستی كۆدەكەنەوە و داوای لە هاوڵاتییان و خێرخوازان كرد ڕۆڵی خۆیان بگێڕن و بەشداری بكەن.
شوێنی كۆكردنەوەی هاوكارییەكان لە مۆزەخانەی نیشتمانیی ئەمنە سوورەكەی سلێمانی دەبێت.
