محەمەد ئیسلامی سەرۆکی ڕێکخراوی وزەی ئەتۆمیی ئێران بەڵێندەدات کارێک نەکەن کە لەگەڵ بڕیارە نێودەوڵەتییەکان سەبارەت بە دۆسیەی ئەتۆمی یەکنەگرێتەوە.
میدیای فەرمیی ئێران لەزاری محەمەد ئیسلامی سەرۆکی ڕێکخراوەکەوە بڵاویکردەوە، بەردەوام و پابەنددەبین بە پەرەپێدانی توانا ئەتۆمییەکانمانەوە لەبواری وزەی ئەتۆم، جەختدەکەینەوە کارێک ناکەین یەکنەگرێتەوە لەگەڵ بڕیارە نێودەوڵەتییەکاندا.
وتیشی، “هەوڵدەدەین کارەکانمان لەچێوەی پێوەرە نێودەوڵەتییەکاندا ڕێکبخەین و ئامانجەکانمان بەو پێیە بەکاربهێنین، ئەوەی گرنگە ئەوەی ئامانجمانە بیکەین، بەئامانجی بەرهەمهێنانی 10 هەزار مێگاوات لە وزەی ئەتۆم”.
ئاماژەی بەوەکرد، هەندێک لە وڵاتانی ناوچەکە و جیهان لە هەوڵی ئەوەدان شێوەیەکی هەڵە لە پیشەسازیی ئەتۆمی پیشانبدەن، بەجۆرێک تەنها پەیوەستە بە پیتاندنی یۆرانیۆم و پیشەسازیی چەک، بەڵام ئەو پیشەسازییە چەندین بوار دەگرێتەوە وەک پزیشکی، کشتوکاڵ و ژینگە.
پێشتر ئێران ڕایگەیاندبوو، وڵاتانی ئەوروپا هیچ پێشنیاز و دەستپێشخەرییەکیان بۆ دانوستاندنی ئەتۆمی و زیندووکردنەوەی ڕێککەوتنی ئەتۆمی نەخستووەتەڕوو.
