ھاوسەرۆکانی یەکێتیی نیشتمانیی کوردستان لە دەباشان پێشوازیانکرد لە میشێل ڕینتێنەر باڵیۆزی ھۆڵەندا لە عێراق و هانس ئەکەربەوم کونسوڵی ھۆڵەندا لە ھەرێم لە دیدارێکدا بە وردیی پێشھات و پرسە سیاسی و ئەمنی و ئابورییەکان تاووتوێکران و بۆچوونیان لەبارەوە ئاڵوگۆڕکرا.
لە ڕاگەیەندراوی كۆبوونەوەكەدا هاتووە، جەختكراوەتەوە لە بەردەوامی پشتیوانییەکانی یەکێتی بۆ پێشخستنی پەیوەندییەکان لەگەڵ ھۆڵەندا و فراوانکردنی ھاریکاریی نێوان ھەردوولا “لەپێناو بەرژەوەندییە باڵاکانی گەلی کورد”.
ئەوەش خراوەتەڕوو، لە دیدارەکەدا ھاوسەرۆکانی یەکێتی بڕیار و ڕاسپاردەکانی یەکێتییان بۆ ھەرێم و عێراق و ناوچەکە خستەڕوو دووپاتیان لە سیاسەتی ھاوسەنگ و شەراکەتی ڕاستەقینە لە بڕیار و حکومڕانی کردەوە و رایانگەیاندووە، “ھەلومەرجی گۆڕاو و ڕوداوەکان وادەخوازن بە کۆدەنگی خۆمان بۆ پرسەکان ئامادە بکەین و کێشەکانمان لەگەڵ بەغدا لەسەر بنەمای دەستوور و یاسا چارەسەربکەین”.
لەبارەی حکومڕانی ھەرێم و نێوماڵی کورد ھاوسەرۆکانی یەکێتیی نیشتمانیی کوردستان جەختیان لە حکومڕانییەکی باشترکردەوە کە داخوازییەکانی ئەمڕۆی کۆمەڵانی خەلك بەرجەستەبکات و لەئاست بژێوی و قەیران و گرفتەکاندا بێت، وەك لە ڕاگەیەندراوەكەدا هاتووە.
ئاماژە بەوەشكراوە، “لە دیدارەکەدا لەبارەی مەترسییەکانی تیرۆریستانی داعش و پاشماوەکانیان لە عێراق بەگرنگییەوە ئەم پرسە تاووتوێکراو ھەڵسەنگاندن بۆ دۆخی ئەمنی کرا و بەرچاوڕوونیدرایە ئامادەبووان و پێویستیی بەردەوامی ھەماھەنگی و ھاوکاریی لەنێوان ھێزەکانی ھەرێم و ھاوپەیمانان دووپاتکرایەوە لەپێناو سەقامگیری و ئاسایشی زیاتر لە ناوچەکە”.
