ڕاگەیاندنی بەڕێوەبەرایەتیی گشتیی شارەوانییەکانی گەرمیان ئاشکرایدەکات، بەهۆی پێنەدانی شایستە داراییەکانی کۆمپانیایەکی پاککەرەوە لە سنووری ئیدارەی گەرمیان، خۆڵ و خاشاکێکی زۆر کە بە هەزار تۆن مەزەندە دەکرێت کۆبووەتەوە.
لە ڕوونکردنەوەیەکدا کە وێنەیەکی بۆ تۆڕی میدیایی ئێستا نێردراوە، شارەوانییەکانی گەرمیان دەڵێت، “(کۆمپانیای گەردین) لە مانگی هەشتی ئەمساڵەوە دەستبەکاربووە و لەلایەن وەزارەتی دارایی و بانکی گەرمیانەوە تەنها مووچەی مانگەکانی (8 و 9 ) یان بۆ خەرجکراوە و ئێستا بە پاساوی نەبوونی پارەی پێویست لە بانکدا، مووچەی مانگەکانی (10 و11) یان بۆ خەرجناكرێت، ئەگەر مانگرتنی پاکەوانەکان بەمشێوەیە بەردەوامبێت کارەساتی ژینگەیی ڕوودەدات”.
شارەوانییەکانی گەرمیان داواکارە لە لایەنە پەیوەندیدارەکان و وەزارەتی دارایی، خەمخۆرانە هاوکاریان بن لە دابینکردنی مووچەی پاکەوانەکانی کۆمپانیاکە بۆ ئەوەی لەوە زیاتر هاوڵاتییان هەراسان نەبن بەدەست خۆڵ و خاشاکەوە”.
