مەحمود سەنگاوی لەبارەی ئۆپەراسیۆنەكەی ئەمڕۆی دژ بە داعش و هەروەها دەنگۆكانی دوورخستنەوەی قسەی بۆ تۆڕی میدیایی ئێستا كرد.
مەحمود سەنگاوی بەرپرسی میحوەری گەرمەسێر و ئەندامی مەكتەبی سیاسیی یەكێتیی نیشتمانیی كوردستان، لە مەیدانی ئۆپەراسیۆنەكەی ئەمڕۆوە قسەی بۆ تۆڕی میدیایی ئێستا كرد، ڕایگەیاند، هەریەكە لە هێزەكانی دژەتیرۆر، هێزی ئاڵتونی و هەروەها پێشمەرگە لە كاتژمێر 6:00ی بەیانییەوە دەستیان بە ئۆپەراسیۆن كردووە دژی چەكدارانی داعش و تا ئێستا بەردەوامە، بەتایبەت لە میحوەرەكانی دوو و سێ، كە بوونەتە پەناگە و ڕێگای تیرۆریستان بەرەو كەركوك و خانەقین.
زانیاریی ئەوەی دا، كە لە ئۆپەراسیۆنەكەدا هیچ ڕووبەڕووبوونەوەیەك لەگەڵ چەكدارانی داعش ڕووینەداوە، بەڵام كۆمەڵێك پەناگەی چەكداران لەناوبراون و دەستیش بەسەر خۆراك و پێداویستیی دیكەی چەكدارەكاندا گیراوە و لەناوبراون، هەروەها ئۆتۆمبێلێكی بۆمبڕێژكراو تەقێندراوەتەوە.
سەنگاوی دڵنیاییشی دا لەوەی ئۆپەراسیۆنەكان بەردەوام دەبن، وتیشی، “دڵنیاین لە سەركەوتن و پارێزگاری لە ناوچەكە و خەڵكەكە دەكەین و تۆڵەی خوێنی شەهیدەكان دەكەینەوە”.
مەحمود سەنگاوی قسەشی لەبارەی دەنگۆی دوورخستنەوەی وەكو بەرپرسی میحوەری گەرمەسێر كرد، بۆ ئێستای ڕاگەیاند، “دەنگۆی سۆشیال میدیایە”.
