بەرپرسێكی یەكێتی لە كەركوك داوا لە هەردوو حکومەتی بەغداد و هەولێر دەكات بۆشاییە ئەمنییەكان پڕبكەنەوە و دەڵێت، پەلامارەكانی داعش بێوەڵام و گورزی پێشمەرگە تێناپەڕێ.
ئاسۆ مامەند، سەرپەرشتیاری کەرکوک – سەڵاحەدینی یەكێتیی نیشتمانیی كوردستان سەبارەت بە جموجوڵەكانی ئەمدواییەی داعش و بەتایبەت هێرشەكەی سنووری (قەرەسالم) پەیامێكی بڵاوكردەوە ڕایگەیاند، هەموو لایەک دڵنیادەکەینەوە ئەو تاوان و دەستدرێژییانەی تیرۆریستانی داعش بەرامبەر بە کورد ئەنجامی دەدەن لەو ناوچانە “بە بێ وەڵام و گورزی پێشمەرگە” تێناپەڕێ.
دەشڵێت، وەك یەکێتی لە پارێزگای کەرکوک – سەڵاحەدین بە هەموو لایەکی ڕادەگەیەنین؛ بە تایبەتی کوردستانییانی کەرکوک و خورماتوو، کە “تەواوی پیلانگێڕییەکانی تیرۆریستانی داعش پوچەڵدەکەینەوە و تۆڵەی یەک بە یەکی شەھیدەکانمان لە دووژمنان و ناحەزانی میللەتەکەمان دەکەینەوە”.
بەرپرسەكەی یەكێتی داواش لە هەردوو حکومەتی بەغداد و هەولێر دەكات “هەرچی زووە، هەوڵی پڕکردنەوەی ئەو بۆشاییە ئەمنییە بدەن کە لە نێوان سوپای عیراق و هێزی پێشمەرگە لە ناوچە کوردستانیەکاندا دروست بووە”.
شەوی ڕابردوو ژمارەیەك لە پاشماوەی چەكدارانی داعش هێرشێكیان بۆسەر سەنگەرێكی پێشمەرگە لە بەرزاییەکانی قەرەسالمی ناوچەی شێخ بزێنی کەرکوک ئەنجامدا و بەهۆیەوە چوار پێشمه‌رگه شه‌هیدبوون و دووانى دیكه‌ش برینداربوون.
بەهۆی ڕووبەڕووبوونەوە و بەرگریی هێزەكانی پێشمەرگەشەوە پەلامارەكە تێكشكێندراوە و ژمارەیەک له چه‌كداره‌كانى داعش كوژراون و ئەودوای چەكدارەكانی دیكەش هه‌ڵاتوون.
