بەڕێوەبەری پۆلیسی سەرپەرشتیکردنی شوێنە گشتییەکانی تاران ڕایگەیاند، “بەکارهێنانی ناوی (تورکی و کوردی و لوڕی و باکووری) بۆ شوێنە گشتییەکان قەدەغەیە.
نادر مورادی، بەڕێوەبەری پۆلیسی سەرپەرشتیکردنی شوێنە گشتییەکانی تاران بە ئاژانسی میهری ئێرانی ڕاگەیاندووە، “بەپێی ڕێنمایی وەزارەتی فەرهەنگی وڵات کە پۆلیسی ئاگادارکردووەتەوە، ناوی شوێنە گشتییەکان بەدڵنیاییەوە دەبێت تەنها فارسی بن”.
ئەو بەرپرسەی پۆلیس وتوویەتی، “بۆ نموونە لە تاران هەندێک شوێن هەن ناوی کوردی و تورکی و لوڕییان هەن و ئەوەش پێچەوانەی یاسایە و وەک یاساشکێنی مامەڵەی لەگەڵدا دەکرێت”.
بەوتەی بەڕێوەبەری پۆلیسی سەرپەرشتیکردنی شوێنە گشتییەکانی تاران، ناوی زمانەکانی دیکە دەبێت لە شوێنەکانی نیشتەجێبوونی خۆیان بەکاربهێنرێت.
بەپێی ئەو ئامارانەی کە حکومەتی ئێران بڵاویکردوونەتەوە، لە ئێران لە %60 خەڵک فارسی بەکاردەهێنن و %16 بە زمانی کوردی قسەدەکەن و بەکارهێنانی زمانی “تورکیی ئازەری” %16یە.
ئەم ئامارە لەلایەن ڕێکخراوەکان و چالاکانی ئەو نەتەوانەی وەک کەمینە دانراون ڕەتدەکرێتەوە و پێیانوایە بەمەبەست ئەو ئامارانە بڵاوکراونەتەوە.
