چێوهى هەماهەنگیى شیعەکان “بەتەواوى” ئەنجامى کۆتایی هەڵبژاردن ڕەتدەكاتەوە و ڕەخنهش له كۆمسیۆن دهگرێت بەوەی “به جددى كارى لهسهر تانهكانیان نهكردووه”.
له ڕاگهیهندراوێكدا چێوهى ههماههنگیی هێزه شیعهكان ڕایگهیاندووه، کۆمسیۆن و دەستەی دادوەری بەشێوەیەکی جدی کاریان لەسەر تانەکانیان نەکردووە، بەو پێیەی چێوەكە پێیوایە، ئەو بەڵگانەی پێشكەشیانكردووە، بەشێوەیەک بوون کە “چاوەڕێمان دەکرد کۆمسیۆن بڕیاری ژماردنەوەی دەستیی سەرجەم وێستگەکان بدات”.
بۆیە چێوهى هەماهەنگی دووپاتیدەكاتەوە، ”بەهەموو شێوەیەک ئەنجامە ڕاگەیەندراوەکانی کۆمسیۆن ڕەتدەکەینەوە و ئێستاش گومانمان هەیە لە هەوڵەکانی کۆمسیۆن بۆ دووبارە ژماردنهوهى دەنگەکان”، پێیانوایه، کۆمسیۆنی هەڵبژاردنەکان و دەستەی دادوەری بەشێوەیەکی جدی کاریان لەسەر تانەکان نەکردووه.
ههر بهپێی ڕاگهیهندراوهكهى چێوەی هەماهەنگی، “لەماوەی ڕابردوودا دژیەکی لە لێدوانەکانی کۆمسیۆندا هەبووە، چونكه پێشتر جهختیان لهوهكردبووهوه تانەکان گۆڕانکاریی له ئەنجامەکاندا دروستکردووە، بەڵام دواتر ڕایانگەیاند، ئەنجامەکانی جیاکردنەوەی دەستی و ئەلیکترۆنی 100% هاوتا بوون”.
