وەزارەتی سەرچاوە ئاوییەکانی عێراق ئاشکرایکرد، کەمبارانی لە چەند مانگی داهاتووی وەرزی زستاندا بەردەوام دەبێت و ئەوەی ئەمساڵ توندترە بەراورد بە ساڵانی پێشوو.
مەهدی حەمدانی وەزیری سەرچاوە ئاوییەکانی عێراق لە کۆنفرانسێکی ڕۆژنامەوانیدا ڕایگەیاند، “لە قەیرانێکی جددیداین، کە قەیرانی وشکبوونەوەیە لە عێراق و ناوچەکە بەگشتی”، هەروەها ئاشكرایكرد، بەپێی پێشبینییەكانی ناوەندی نیشتمانیی سەربە وەزارەتی سەرچاوە ئاوییەکان، لە چەند مانگی داهاتوودا کەمبارانی بەردەوام دەبێت.
بۆیە وەزیرە عێراقییەكە هۆشداریی دا لەوەی، کەمئاوی لەمساڵدا توندتر دەبێت بەراورد بە ساڵانی پێشوو، “لە ساڵی ڕابردوودا ڕێکاری توندمان گرتەبەر تاوەکو بتوانرێت 100%ی کشتوکاڵی وڵات ئاوی پێبگات، بەڵام بۆ ئەمساڵ ئەگەر بێبارانی و کەمئاوی بەردەوام بێت، ناتوانرێت کۆنترۆڵی دابینکردنی ئاو بۆ کشتوکاڵ بکرێت”.
وەزیری سەرچاوەکانی ئاو دەشڵێت، “پێویستە هەموولایەک لەوە تێبگەن قەیرانی کەمئاویمان هەیە و ئەمەش بابەتێکە پەیوەندیی بە گۆڕانکارییە ژینگەییەکانەوە هەیە”.
عێراق لەئێستادا قەیرانی ئاوی هەیە، ئەوەش لە ئەنجامی کەمبارانی، هەروەها دابەزینی بڕی ئاوی دیجلە و فورات بەهۆی گرتنەوەیان لەلایەن ئێران و توركیاوە، بەوهۆیەوە پلانی کشتوکاڵی ئەم وەرزە بۆ 50% دابەزیوە بەراورد بە هەمان وەرزی ساڵی ڕابردوو.
