له ئه‌نقه‌ره و ئیستانبول خۆپیشاندان و ناڕه‌زایی دژى به‌رده‌وامى دابه‌زینى به‌هاى لیره كرا و خۆپیشانده‌ران داواى ده‌ستله‌كاركێشانه‌وه‌ى ئه‌رۆدغان و هه‌ڵوه‌شاندنه‌وه‌ى حكومه‌تیان كرد.
به‌پێی هه‌واڵی میدیا نێوخۆییه‌كانى توركیا، دره‌نگانى شه‌وى ڕابردوو، به‌شێك له هاوڵاتییان و خوێندكارانى زانكۆ له ئه‌نقه‌ره‌ى پایته‌خت و ئیستانبول خۆپیشاندانیان له دژى دابه‌زینه به‌رده‌وامه‌كانى به‌هاى لێره كرد.
ئاماژه‌یان به‌وه‌شكردووه، خۆپیشانده‌ران داوایانكرد حکومەتی تورکیا هەڵبوەشێتەوە، کە پارتی داد و گەشەپێدان سەرۆکایەتی دەکات.
هاوكات لە چەند گرتەیه‌كى ڤیدیۆییشدا دەردەکەوێت، هاوڵاتییان داواى ده‌ستله‌كاركێشانه‌وه‌ى ڕه‌جه‌ب ته‌یب ئه‌ردۆغان سه‌رۆك كۆمار و هه‌ڵبژاردنى پێشوه‌خته ده‌كه‌ن.
هه‌ر به‌پێی هه‌واڵی میدیاكان، دواى خۆپیشاندانه‌كه، هێزه ئه‌منییه‌كان هه‌ڵمه‌تێكیان بۆ ده‌ستگیركردنى ژماره‌یه‌ك چالاكوان و ڕێكخه‌رانى خۆپیشاندانه‌كه ئه‌نجامدا و ژماره‌یه‌كیان ده‌ستگیركراون.
ئەوەش لەکاتێکدایە، بەهای لیرەی تورکی گەیشتووەتە نزمترین ئاستی خۆی لە مێژوودا، بەشێک لە حزبه ئۆپۆزسیۆنەکانی تورکیاش داوای دەستلەکارکێشانەوەی حکومەت و ئەنجامدانی هەڵبژاردنی پێشوەختە دەکەن.
