ئەو كارمەندەی ئێف بی ئای كە سەدام-ی دەستگیركرد بە جەڵتەی دڵ مرد

ڕۆژنامەی دێنڤێر پۆست كە لە شاری دێنڤێر-ی ویلایەتی كۆلۆڕادۆ لە ئەمریكا دەردەچێت بڵاویكردووەتەوە، “جەیمس دەیڤس، ئەو كارمەندەی ئێف بی ئای كە لە ساڵی 2003 هاوكار بوو لە دەستگیركردنی سەدام حسێن، سەرۆكی ڕژێمی پێشووی عێراق مردووە”.

بەگوێرەی ڕۆژنامەكە، بەیانی ڕۆژی هەینی 30ی تشرینی یەكەم لەكاتی پیاسەكردنی لەگەڵ سەگەكەیدا لە شاری دێنڤێر لە ویلایەتی كۆلۆڕادۆ كارمەندەكەی ئێف بی ئای “جەڵتەی دڵ” لێیداوە و بەهۆیەوە گیانی لەدەستداوە.

جەیمس دەیڤس ئەو كەسە بووە كە چووەتە نێو شوێنی خۆشاردنەوەكەی سەدام و دەستگیركردووە، هەروەها سەركردایەتیی ئەو تیمەی كردووە كە هەستاون بە ئۆپراسیۆنەكە و پەنجەمۆر و دی ئێن ئەی-یان لە سەدام حسێن وەرگرتووە لە لێكۆڵینەوە سەرەتاییەكان.

ئەو كارمەندەی ئێف بی ئای وێنەیەكی خۆی و سەدام-ی لای خۆی پاراستووە كە سەرۆكەكەی پیشووی عێراق ڕەتی دەكاتەوە تەماشای كامێراكە بكات بۆ ئەوەی وێنەی بگرێت.

لە چاوپێكەوتنێكی ڕۆژنامەوانییدا لە ساڵی 2008 جەیمس دەیڤس لەبارەی سەدام و كاتی دەستگیركردنەكەیەوە وتویەتی، “پیاوێكی پیر و نەخۆش بوو، دەكۆكی و بارودۆخی تەندروستی باش نەبوو و نانی بەباشی نەدەخوارد”.