سەركردەیەكی ڕێكخراوی بەدر دەڵێت، ئەگەر ئەو ساختەكارییەی لە هەڵبژاردندا كراوە ڕاستنەكرێتەوە، وڵات بەرەو مەترسی و لەناوچوون دەڕوات.
محەمەد جاسم سەركردە لە ڕێكخراوی بەدر باڵی سەربازیی پارتی دەعوەی ئیسلامی ڕایگەیاند، داوا لە دادگای فیدراڵی و مەرجەعییەتی شیعەكان دەكەن بەر لە پەسەندكردنی ئەنجامەكانی هەڵبژاردن، داوای ژماردنەوەی دەستیی دەنگەكانی هەڵبژاردن بكەن و ئەو كارە لەم دۆخە مەترسیدارەدا بووەتە پێویستیی قۆناغەكە.
بەپێی وتەی ئەو، ئەگەر ئەوە نەكرێت ئەوا وڵات بەرەو داخزانی مەترسیدار دەڕوات و ڕوو لە لەناوچوون دەكات.
جگە لە ڕەوتی سەدر كە موقتەدا سەدر سەرۆكایەتی دەكات، لایەنە شیعییەكانی تر ناڕازین لە ئەنجامی بەرایی هەڵبژاردن و بانگەشەی ئەوە دەكەن كە ساختەكاری كراوە و ماوەی مانگێكە لە بەغداد خۆپیشاندان دەكەن.
