وەزارەتی پلاندانان عێراق رایگەیاند، “تێکڕای داهاتی ساڵانەی تاک ساڵی رابردوو نزیکەی حەوت بۆ هەشت ملیۆن دینار بووە و بۆ ئەمساڵیش زیاتر دەبێت”.
لەبارەی داهاتی ساڵانەوە، وەزارەتی پلاندانان عێراق ئاماژەی بەوە کرد، “تێکڕای داهاتی ساڵانەی تاک ساڵی رابردوو نزیکەی حەوت بۆ هەشت ملیۆن دینار بووە و پێشبینیدەکرێت کە تێکڕای ئەو داهاتە بۆ ئەمساڵ زیاترببێت بەتایبەتی دوای کارەکانی حکومەت لە پشتگیریکردنی بەرنامەی پاراستنی کۆمەڵایەتی، کارتی بەشەخۆراک و پێشکەشکردنی خزمەتگوزاری بۆ هاوڵاتییان”.
ئەوەشی خستووەتەڕوو، “کارەکانی حکومەت و بانکی ناوەندیی عێراق توانیویانە هۆکاربن لە دابەزین و سەقامگیری پێوەرەکانی هەڵاوسان و دابەزینی رێژەکانیان لە ماوەی دوو ساڵی رابردوودا، وەک چۆن رێژەی هەڵاوسان لە ساڵی 2021 دا 6٪ بووە و لە ساڵی 2022 بۆ 5٪ دابەزیوە و دواتر لە ساڵی 2023 رێژەی هەڵاوسان 4.4٪ بووە”.
لەو بارەیەوە عەبدولزەهرا هنداوی، وتەبێژی وەزارەتی پلاندانانی عێراق رایگەیاند، “ئەو داهاتە تەواوی دانیشتووان ناگرێتەوە، بەو پێیەی هەر تاکێک داهاتی یەکسان وەرناگرێت و هەندێک کەس داهاتی ساڵانەیان رەنگە نزیکی سێ ملیۆن دینار بێت و هەندێک کەسی دیکە 10 ملیۆن یان زیاتر بێت”.
