پۆلیسی پۆڵەندا ڕایگەیاند، لە درێژەی هەوڵەکانیان بۆ کۆنترۆڵکردنی سنورەکان، ئۆتۆمبێلێکیان پشکنیووە، کە 29 کۆچبەری عێراقی تێدا بووە و بەهاوکاری کەسێکی ئۆکرانی پلانیان هەبووە بگەنە ئەوروپا.
بەپێی وتەی پۆلیس ئەو کۆچبەرانە زۆر هیلاک و برسی بوون و دۆخی تەندروستیان نزیک بووە لە خراپەوە، بەڵام هاوکاری کراون و خواردن و ئاوی پێویستیان پێدراوە.
پۆلیسی پۆڵەندا دەڵێت، ئەو عێراقیانە ویستویانە بەهاوکاری کەسێکی ئۆکرانی سنورەکان تێپەڕێنن، بۆیە ئەو کەسە ئۆکرانییەش بە تۆمەتی قاچاخچێتی دەستگیرکراوە.
سەرەڕای مانەوەی کۆچبەرانی کورد و عێراقی لە سنورەکانی بیلاڕوسیا و پۆڵەندا، لەناو پۆڵەنداش چەندین کورد هەن، کە لەلایەن پۆلیسەوە دەستگیرکراون و زیندانیکراون، یان لەناو کامپدا دانراون.
